The Definitive Guide to Living in the Capital , Cairo , Egypt

“بوكليت” مكتبة ومقهى ثقافى فى الدقي،بـ تخاطب نوعية معينة من البشر بفكرته، بـ يتحدى الدوشة وقلة المزاج وطول المسافة اللى بـ تقطعها لما بـ تحب تروح أى مكان سواء بقى حبيت تقرأ، أو تسمع مزيكا حلوة، أو تشرب فنجان قهوة بمزاج، أو حتى تحضر حفلة،أو أمسية شعرية.. إلخ.

بوكليت أو Booklet مقسمة إلى 3 أجزاء: الصالة الرئيسية ودى عبارة عن مكتبة لاقتناء وشراء الكتب المختلفة، والكافيهودهبـ يقدم مشروبات أسعارها معقولة ووجبات سريعة، بعد كدة هـ تدخل على التراس وده تقريبًا ألطف مكان هناك،بـ يطل على حديقة الأورمان، كان فى البداية مستقل ومغلق لكن بعد وجود عدد من الشكاوى لعدم إمكانية التدخين تم افتتاحه.

بعد كده تدخل على القاعات وهم عبارة عن 4 قاعات ولهم أكثر من استخدام: 3 قاعات مساحتهم صغيرة إلى حد ما بـ تكفى حوالى 25 فرد فقط، القاعة الرابعة بـ تزيد فى المساحة شوية(حوالى 35 فرد)، بـ يتم داخل الــ4 قاعات أكثر من نشاطكل حسب الإمكانيات والمساحة أولها الورش وهى عبارة عن ورشة لتعليم الرسم والعود، وطبعًا قلة الورش فى المكان شيء يؤخذ عليهم ولكن لأنهم لسه فى البداية هـ نعذرهم، ممكن كمان لوعندك حدث مهم تأجر القاعةاللى تناسبك زى استضافة أشخاص، أو اجتماع،أو حفل توقيع كتاب، أو تسجيل مع أحد الضيوف…إلخ. مادام لا يختلف مع سياسة وثقافة المكان فهو متاح، بالنسبة لأسعار الإيجار القاعة الكبيرة 40 جنيه للساعة، والقاعات الصغيرة 30 جنيه للساعة، والقاعات مجهزة بشاشة عرض،ووايت بورد بـ 15 جنيه للساعة، كروما سينما للتصوير السينمائى وWi-Fi.

ده بالنسبة للأنشطة الخاصة بأعضاء Booklet،بالنسبة للأنشطة الداخلية فيه حفلات أى نعم ضيوفها غير معروفين إلى حد ما  إلا أن الاختيارات مناسبة، كمان بـ يتم عمل صالونات أدبية، وندوات شعرية، وأمسيات ومنوعات أدبية مختلفة… إلخ، بالإضافة لمجهودهم فى الدعاية والإعلان عن الحدث أو عن الشخص أيًا كان، بالنسبة للأسعار مش كل الأحداث بـ تكون بتذاكر ولو فيه بـ تكون أسعار رمزية.

الحقيقة أن المكان متميز وعلى ضمانتنا كمان كل فريق العمل من الشباب  وجوههم بـ تضحك لما يشوفوك ويحبوا يساعدوك فى أى حاجة، عندهم شوية قواعد زى ممنوع الكلام فى الدين، والسياسة والكورة أو بمعنى أدق السياسات اللى بـ ينتج عنها انقسامات أو عنصرية، عندهم كمان إمكانية الاحتفال بعيد ميلاد وبـ تكون التجهيزات حسب الاتفاق مع الإدارة، بـ يساعدوا كمان أصحاب الحرف اليدوية زى الإكسسورات بأنهم بـ يوفروا لهم مكان يوزعوا فيها شغلهم، بـ يوفروا مجموعة لا بأس بها من الأسطوانات الموسيقية للبيع،وكمان بـ يتقبلوا أى فكرة جديدة وبـ يرحبوا بها، وعاملين عروض حلوة وتجهيزات لشهر رمضان.

المكان قريب من أماكن كثير، وتقريبًا مُحاصر بأكثر من مكان حيوى زى جامعة القاهرة، والمدرسة الألمانية، والمركز الثقافى الروسى ومعهد جوته.