The Definitive Guide to Living in the Capital , Cairo , Egypt

الدنمارك:

مكتبة مصر العامة أو مكتبة الزاوية الحمراء شغل ثقافى جديد ومهم في قلب القاهرة.. هي أحدث فروع مكتبات مصر العامة (كتبنا لكم قبل كده عن فرع الدقى).. المشروع ده ثمرة للتعاون المشترك بين الحكومة المصرية –ممثلة في محافظة القاهرة ووزارة الثقافة ووزارة الاتصالات ووزارة التعاون الدولي– والحكومة الدنماركية اللى ساهمت في تكاليف الإنشاء والتأثيث.. ومن هنا نقول: “شكرًا للدنمارك”.

الموقع:

موقع استراتيجي مهم جدًا ومحروم من الخدمات الثقافية وهى منطقة الزاوية الحمراء حولها المدارس ومراكز الشباب والأندية الرياضية والتجمعات السكنية العالية وأغلب السكان هناك بـ يغلب عليهم الطابع الشعبي، كل ده من غير مكتبة.. بالذمة ده كلام؟

المعمار

معمار المكتبة حاجة تحفة كأنك داخل قصر والمبنى كبير بالفعل.. ومجهز بأحدث الأجهزة التقنية والتكنولوجية وشبكات الاتصال، والكراسى والقاعات هـ تلاقيها ماشية مع المواصفات القياسية للمكتبات العالمية.

وكمان فيها كتب من أحدث ما أنتجه الفكر الإنساني فى العلوم والآداب من كتب ومراجع علمية ومواد سمعية وبصرية ووسائط متعددة للأطفال والكبار… يعنى لازم تلاقى اللى عاوزه وتستمتع كمان.

المواهب:

ومن الحاجات المهمة فى المكتبة أنك هـ تلاقى ورش مهتمة بالأطفال والشباب والمواهب وسعى دائم ومهم للكشف عن المواهب الإبداعية الشابة فى أغلب المجالات.

وكمان شغل على تنمية الفكر والإبداع بين أهالى المنطقة.. وعندهم أكثر من 60 ألف مادة ثقافية تشمل أحدث الإصدارات من الكتب للكبار والأطفال والمراجع العلمية والمواد السمعية والبصرية.

كأن المكتبة بـ تحاول تعمل جسر ما بينها وبين الأهالى من خلال جدول أنشطة وورش عمل وحفلات فنية مميزة طوال الشهر.. وده مش غريب على أ/ إيمان عبد المحسن مديرة المكتبة اللى بـ تشيل دائمًا هم المكان اللى شغالة فيه من ساعة ما كانت مسؤولة عن مكتبة “طلعت حرب” لحد ما بقيت مديرة مكتبة مصر فرع الزاوية.. وكمان لازم نتكلم عن الأنشطة الثقافية ومهرجانات الأطفال المختلفة وتقديم الأنشطة الثقافية واللى قائم عليها الشاعر/ كريم ماهر.. وده برضه مش غريب عليه من ساعة ما كان شغال فى ساقية الصاوى لحد ما راح مكتبة مصر العامة.. سيبك أهم حاجة روح الفريق.

نقول لكم..

مساحة المكتبة 4200 متر مربع.. المبنى لوحده مساحته 2000 متر مربع والمساحة الباقية مخصصة للمسرح الرومانى والمسطحات الخضراء والكافيتريا ومكان انتظار العربيات…. والمبنى بـ يتكون من ثلاثة طوابق غير البدروم وفيه قاعات للحفلات ومسرح كبير وقاعة مؤتمرات وقاعات للورش وللكمبيوتر والدوريات والمجلات والاشتراكات ومعمل لغات والمعارض.. وكمان فيه إمكانية الاستعارة من المكتبة.