The Definitive Guide to Living in the Capital , Cairo , Egypt

تقريبًا 90 % من الناس اللي بـ تشتغل في الدقي وبالتحديد شارع مصدق ونادي الصيد وشارع كلية الزراعة بـ يفطروا من عنده الصبح، مطعم «صافو الدمياطي» من علامات المنطقة وواحد من أشهر مطاعم الأكلات الشرقي زي الفول والطعمية والشكشوكة والسجق والكبدة الإسكندراني، شغال على الدليفري بنسبة كبيرة، أو الناس بـ تروح تأكل على الواقف كدة قدام المحل، وده لأنه صغير ومافيش مكان للقعدة في الداخل، باستثناء ترابيزة واحدة صغيرة تكفي شخصين، وكاونتر يكفي شخصين تانيين.

خوضنا التجربة داخل المحل بعد ما كنا بـ نتمشى في المنطقة، والمحل يعتبر مش في شارع مصدق نفسه رغم أنه كاتب أنه في مصدق في العنوان، لكن هو في شارع جانبي متفرع من مصدق أو على الأقل واجهة المحل مش على شارع مصدق، لكن هو قريب جدًا من هارديز وجولي للبصريات، وحجمه صغير زي ما قلنا، لكن أمامه أسطول من الموتوسيكلات بتاعة الدليفري، لأن ده الاعتماد الاساسي لنشاط صافو ملك الساندويتشات، وعلشان الدقة، ملك الإفطار لشركات وموظفي الدقي.

منيو بسيط مُعلق على واجهة المحل، وفيه منه نسخ ورقية هـ تلاقيها في كل أركان المحل، ساندويتشات وعلب وأطباق داخل المطعم ووجبات ومشروبات، فول بكل الإضافات الممكنة، بطاطس وبيض وبتنجان  وجبنة بالطماطم، شكشوكة  ومسقعة وطرشي بلدي، فيه شويه ساندويتشات لحوم زي الكبدة والسجق والسوسيس والفراخ البانيه والكفتة الجريل وبرجر بالبيض والجبنة. الأسعار حنينة قوي من أول جنيه ونصف وأغلى ساندويتش بـ  9 جنيه اللي هو البرجر أو الفول بالسوسيس، وفيه بطاطس بالكبدة الإسكندراني وسجق بالبيض المقلي بـ 6.5 جنيه، اختراعات ظريفة لكسر ملل الحشو المعتاد.

قعدنا على الترابيزة الوحيدة اللي جوة وطلبنا طبق فول بالسجق (10 جنيه) وبيض بالبسطرمة بالجبن الرومي (15 جنيه) وده أغلى طبق في المطعم بالمناسبة، وطبق بتنجان مقلي (2.5 جنيه) وسلاطة خضراء (2.5) وطبعًا لأننا مجربين ساندويتشات صافو قبل كدة نقدر نقول لكم أن الأطباق مش بنفس جودة الساندويتشات، الأكل حلو صحيح والفول بالسجق بالذات، لكن مش عارفين إزاي بـ يخلوا طعم الساندويتش حاجة تانية! ويمكن علشان العيش اللي جابوه كان عيش شامي صغير مش حلو قوي في التغميس، والبيض بالجبن الرومي كان حلو بس البسطرمة نفسها مش حلوة، كانت مقطعة زي المكعبات مش شرائح، والبتنجان مقلي كويس بس ناقصه توابل أو خلطة فلفل وثوم عليه، برضه التخصص فارق في موضوع الأكل داخل المطعم ده، أكيد الدليفري والساندويتشات أحسن بمراحل.

ما تضايقناش قوي بالتجربة في صافو لأننا كنا عارفين أننا بـ نجرب حاجة مش هي أفضل ما عنده، هو الراجل بتاع ساندويتشات ومش عامل صالة طعام أصلًا، فأكيد تخصصه الدقيق هو شاطر فيه وهو سر نجاحه، بس في النهاية لازم نقول أن الأكل نظيف ومعمول بعناية، والخدمة مهذبة داخل المحل وده المهم، بس المرة الجاية تيك آواي أو دليفري.