The Definitive Guide to Living in the Capital , Cairo , Egypt

موجود في نهاية شارع إبراهيم اللقاني بالقرب من قصر الاتحادية بمصر الجديدة، محل صغير يا دوب تقدر تدخل لوحدك بالجنب علشان توصل للكاونتر اللي قاعد عليه صاحب المحل، محل «رستن» من أقدم محلات الساعات في المنطقة، مشهور في الأصل بأنه بـ يصلح ويركب قطع غيار للساعات بأنواعها المختلفة، لكن بجانب ده عنده موديلات محدودة من ساعات اليد الكوارتز أو العقارب والساعات الرقمية، وكله معروض في واحدة من أصغر الفتارين اللي شوفناها في حياتنا، لكن ده ما يمنعش أنك عينك هـ تزغلل من كثر الساعات المعروضة وهـ تلاقي نفسك واقف مدة طويلة مستمتع بكل التشكيلة دي، والأسعار المكتوبة على كل ساعة هـ تغريك أنك تدور أكثر يمكن تلاقي أرخص، وهو ده الحلو في المحلات القديمة اللي بـ تتبع الطريقة الكلاسيكية في العرض، وبـ تخلينا في بعض الأحيان نفضلها عن المحلات الكبيرة الموجودة في المولات والشوارع التجارية الكبرى.

بـ نشوف محل «رستن» من بعيد وكنا مش متخيلين أننا في يوم من الأيام ممكن نكتب عنه، لأنه زي ما قلنا أصغر من اللازم، ومستخبي أكثر من اللازم، لكن بمجرد ما قربنا منه لاقينا أنه يستاهل فعلًا أننا نعرف الناس به، لأنه بجانب التصليح بمهارة ودقة فائقة وده عن تجربة بعض أصدقائنا هناك، لقينا عنده ساعات من ماركات عالمية أصلية بأسعار كويسة جدًا، بجانب مجموعة من الساعات غير الأصلية أو الـ First Copy زي ما بـ يقولوا وهي أحسن درجات التقليد من موديلات سويسرية زي تاجور ورولكس وزينيث وأيدوكس وتيسوت، الموديلات الأصلية من الساعات دي أسعارها بـ تتراوح ما بين 25000 لـ 35000 جنيه وفيه موديلات طبعًا فيها ماء ذهب وأحجار كريمة بـ توصل لأرقام خيالية، لكن هنا هـ تلاقي كل الموديلات اللي تتخيلها وبتقليد عالي الجودة مش هـ تقدر تفرقه عن الأصل، وبمكونات يابانية أصلية وبأسعار من 400 لـ 1000 جنيه بس، الفرق هنا أنها مش ضد الماء، وطبعًا مش بالضمان.

نروح بقى للموديلات الأصلية وهي ألبا وسيتزن وكاسيو، أسعارها زي التقليد تقريبًا من 400 جنيه لحد 900 جنيه، موديلات أنيقة جدًا ومعظمها رجالي، أستيك معدن أو جلد أسود وبني، وممكن تغير أستيك أي ساعة أو تبدل المعدن بالجلد أو العكس، فيه كمان موديلات الـ Q&Q بأسعارها اللي في متناول الجميع، من أول 70 جنيه لحد 180 جنيه ممكن تجيب ساعة حلوة وعملية. والساعات الرقمية هنا كلها كاسيو، وهـ تلاقي الموديلات الكلاسيكية منها وأشكال رياضية حديثة، وفيه ستوب ووتش كمان بـ 70 جنيه. وطبعًا الميزة الأهم في الموديلات الأصلية دي أنها ضد الماء.

ميزة المحل ده أنك بـ تحس بتكلف وأنت واقف تتفرج أو بـ تستفسر عن أي حاجة، كأنك واقف مع واحد صاحبك بـ تسأله عن رأيه في مواصفات الساعة وشياكتها، لكن كان نفسنا يبقى فيه مراية علشان نعرف نشوف الساعات من بعيد، شكلها بـ يختلف برضه. تجربتنا في «رستون» كانت حلوة علشان الأمور فيه كانت واضحة؛ الأصلي واضح والتقليد واضح، والفرق معروف، مافيش خداع أو تضليل زي ما بـ نشوف في محلات ثانية وللأسف بـ تبقى مشهورة ولها سمعة.