The Definitive Guide to Living in the Capital , Cairo , Egypt

فجأة لاقينا مول وفوود كورت عملاق ظهر في القاهرة الجديدة، مش عارفين فتح إمتى أو ازاي، وفين الدعاية اللي سبقته أو الإعلانات على الطرق السريعة، مول «إميرالد إمباير – Emerald Empire» أنيق ومبهر بزيادة، وعجبنا أنه موجود في مكان فعلًا كان محتاج صرح ترفيهي زي ده، وهو بجوار سور أكاديمية الشرطة في التجمع الأول، يعني على حدود مدينة نصر مع القاهرة الجديدة، قريب جدًا من الطريق الدائري وطريق السويس. الملفت أن المكان فخم وأنيق فعلًا وواضح أنه متكلف كثير، وفيه ساحات انتظار للسيارات وأفراد أمن في كل مكان، واضح أننا محتاجين أكثر من زيارة نستكشف كل أرجاء أميرالد مول ونوصفه بدقة أكبر، لكن النهارده هـ نتكلم عن واحد من المطاعم الموجودة فيه وهو «رينبو – Rainbow».

مطعم وكافيه بمنيو عالمي متنوع، موجود في أقصى الشمال أول ما تدخل البوابة الرئيسية للمول، في مكان مميز له View ظريف على المساحة الخضراء اللي في منتصف الفوود كورت، وهو في الدور الأرضي لكن مافيش فيه أماكن للجلوس خارج المحل، كلها مساحة داخلية مغلقة، وده كان كويس لأن الجو كان برد وقت زيارتنا، لكن مش عارفين في الصيف والحر هـ نحتاج القعدة اللي بره ولا إيه، المهم أننا دخلنا المكان الهادئ وأخذنا ترابيزة كبيرة في أحد الأركان. الديكورات بسيطة وظريفة، بالألوان النبيتي والأبيض، ولوجو المكان المميز منتشر في كل تفاصيل المحل وهو عبارة عن شريحة برتقال واخدة من درجات ألوان قوس قزح. مساحة المطعم مش كبيرة، وفيه شاشات في كل حتة، ممكن تتابع مباريات الدوري الأوربي هنا، وممكن تسمع مزيكا حلوة لو مافيش مباريات، المهم أننا عجبنا القعدة وجو المكان رغم أن مش بنفس فخامة المطاعم اللي حوله وفخامة المول نفسه.

منيو متنوع فيه كل حاجة من الساندويتشات والبرجر والبيتزا والأطباق الرئيسية والفاهيتا وسلاطات، وطبعًا الحلويات والمشروبات التقليدية لكل الكافيهات، لكن مافيش شيشة. طلبنا من الويتر يقول لنا ترشيحاته لأفضل الأطباق لكن هو أكد لنا أنهم بـ يعملوا كل حاجة حلو، وأننا ممكن نطلب بقلب جامد، فنوعنا طلباتنا وجربنا البيتزا والسكالوب والمقبلات المختلفة والكيك وبعض المشروبات.

رينبو سامبلر هو طبق المقبلات المتنوعة (49 جنيه) فيه أصابع موتزاريلا ودجاج تندر وحلقات بصل سبرنج رولز بالخضار وصويا صوص وساور كريم، الكميات كبيرة والأصناف كلها حلوة، لكن أول ملحوظة – وده مش في المقبلات بس لكن في الأكل كله أن الزيت كثير، الأكل ثقيل وفيه نسبة دهون عالية، يمكن ده ما أثرش على المذاق لكن هي حاجة لازم يراعوها في طرق التسوية بعد كده، أو يغيروا نوع الزيت. طبق السكالوبيني (62 جنيه) هو قطعة بيف فيليه مش مقلية زي ما كنا فاكرين، لكن مستوية على جريل مع تشويحة خفيفة على النار ومغطاة بطبقة جبن شيدر وتركي مدخن، ومعاه بطاطس بيوريه كريمية رائعة وسوتيه نص نص، لكن الطبق في مجمله ممتاز وكميته كبيرة فعلًا، ومذاق اللحم أكثر من رائع. بيتزا فييستا (43 جنيه) فيها إضافات الببيروني والمشروم والتركي، عجينة طرية وإضافات فريش كثيرة وحجم كبير، البيتزا هنا تأخذ العلامة الكاملة.

بعد الأكل حاولنا نجرب رينبو كيك (25 جنيه) لكن طلعت مش فريش لأنها كانت آخر قطعة باقية، فالويتر قال لنا بلاش المرة دي، وخلانا نجرب تارت الشوكولاتة أو المولتن كيك الغرقانة في الشوكولاتة الساخنة (28 جنيه) وجاءت لنا قطعة كبيرة جدُا لكن مش بالحلاوة اللي كنا متوقعينها، كانت ناقصة نكهة والشوكولاتة مش غنية زي ما المفروض تكون.

الخدمة راقية ومهذبة جدًا، وقدموا لنا مشروب هدية من المحل عبارة عن لبن بسيرب الفراولة والتوت، حلو ومنعش، الحقيقة حبينا وقتنا في «رينبو» واستمتعنا بالكميات المهولة للأكل، وأخذنا الباقي تيك آواي، وأكيد هـ يكون لنا زيارات كثير لإميرالد مول بعد ما اكتشفنا كنز المحلات اللي هناك.