دليل كايرو 360 لأفضل مطاعم في القاهرة عام 2013
Cairo 360
على مدار عام كامل ووسط كل الظروف الصعبة اللي شهدتها مصر والأحداث الساخنة والقاهرة اللي ما بقيتش ساهرة بسبب حظر التجوال اللي استمر 3 شهور أو ربع سنة 2013 بالتمام والكمال، كان فريق كايرو 360 من أول مدير التحرير لحد أصغر محرر بـ يتحرك في كل مكان في العاصمة وبـ يدور على حاجة جديدة يكتب عنها علشان يعرف القراء أن الحياة ماشية ما وقفتش ولا هـ تقف وأن كل يوم فيه حاجة جديدة نتكلم عليها غير السياسة ومتابعة الأخبار.
ولأن أيقونة الموقع وسمته المميزة هي المطاعم والجديد في عالم الأكلات والمطابخ المتنوعة اللي بـ تنتشر كل يوم في شوارع القاهرة، كان للمطاعم نصيب الأسد من جولاتنا وزياراتنا ومقالاتنا النقدية، وزي ما استمتعنا ببعضها عانينا أشد معاناة في البعض الآخر، بس الأكيد أننا نقلنا لكم تجاربنا بكل وضوح وشفافية، من غير مبالغات ولا تهوين، وكعادتنا في نهاية كل سنة بـ نختار أفضل 10 مطاعم أو الـ Top 10 اللي زرناهم وأخذوا أعلى التقييمات بالنجوم زي ما حضراتكم عارفين، وفي الموضوع الخاص ده حاولنا نكون منصفين قدر الإمكان وتبقى اختيارتنا لعوامل متعددة مش مجرد طعم الأكل الجيد، وبـ نفكر حضراتكم أن الترتيب هنا عشوائي مالوش علاقة بالأفضلية.
نبدأ بواحد من أهم المطاعم اللي اشتهرت مؤخرًا بملكيتها للفنان أحمد حلمي وشريكه المصمم الشهير هاني محفوظ، مطعم وكافيه «زين» موجود في تيفولي دوم في الشيخ زايد، مطبخ عالمي يميل لـ “اللبنانى”، اتوهمنا فيه بالأطباق الرئيسية وخصوصًا الباستا والتشيكن بلانكيت اللي جربناهم. وبجانب المطبخ الرائع أنت هنا بـ تمتع نظرك بديكورات فريدة وأعمال الفنان هاني محفوظ بـ تزين الجدران وكل التفاصيل اللي حولك. كانت لنا زيارة ثانية لـ «زين» وقت السحور في رمضان اللي فات وعجبنا جدًا أكيد، وبـ نعتقد أنه هـ يفضل في القمة في السنوات القادمة بين مطاعم العاصمة.
استغربنا شوية لما سمعنا عن مطبخ بدوي أو عربي خليجي داخل سيتي ستارز الشهير بالمطاعم العالمية والأسماء الرنانة، لكن الدعاية بتاعة «بدوية» كانت مالية الدنيا وكانت دافع قوي أننا نزور المكان ونكتب عنه، وما ننكرش أننا اعتبرنا الدعاية الزائدة مؤشر لضعف مستوى المحل أو محاولة لكسب الصيت على حساب الجودة، لكن تجربتنا هناك غيرت نظرتنا لـ «بدوية» واعتبرناه من أنجح المطاعم المتخصصة في القاهرة، بـ يقدم الأكلات البدوية والخليجية زي الأوزي المشوي مع أنواع الأرز المختلفة زي البرياني والمضبي والمندي، وبـ يقدم مشويات ما حصلتش على الطريقة الصحراوية، لحم الغنم هنا زي ما بـ يقولوا عليه له طعم ثاني، والمزج بين المطبخ البدوي والشكل الحضاري المعاصر للمطعم كان موفق جدًا، مع مستوى مميز للخدمة وكل المقبلات والأصناف اللي هـ تحتاجها في النوع ده من المطابخ هـ تلاقيها في «بدوية» زي الكتاب ما بـ يقول.
في قلب العاصمة وبالتحديد في أبراج نايل سيتي المهيبة كان لنا تجربة مع واحد من أفضل المطاعم الآسيوية العالمية، «سايجون بلو» مش مجرد قعدة كلاسيكية راقية بـ تستمتع فيها بموسيقى الجاز الحية وتسترخي مع الأضواء الخافتة الخاملة الموزعة بدقة، لكن هنا أنت هـ تستمتع بكل طبق هـ تطلبه سواء كنت من هواة السوشي والمأكولات البحرية أو لو هـ تأكل سمان مشوي مع الدريسنج الآسيوي المميز. «سايجون بلو ريستوران & لاونج» مناسب جدًا لخروجة رومانسية وسهرة لطيفة مع حد بـ تحبه، ممكن نكون دفعنا فلوس زيادة شوية بس التجربة كانت تستاهل.
كبابجي ميدان الدقي الشهير، إللي حتى لو ما تعرفش اسمه فأنت على الأقل عارف مكانه وشايف من على بُعد الدخان المتصاعد من شوايته العملاقة. كبابجي «عَظَمَة» بـ يعمل أحلى كباب وكفتة وفراخ مشوية على الفحم، أسعاره معقولة لأنه محافظ على الستايل الشعبي وقعدة الشارع ونظام الخدمة العشوائي المحبب لرواد مطاعم الشوارع. لكن الأكيد أنك هـ تنبسط بوجبتك في «عظمة» وتحس أنك بـ “ترم عظمك” بأكلة كباب معتبرة ومعاها طاجن خضار من اللي هو أو رغيف حواوشي، وهـ تنبسط أكثر وأنت قايم ومش دافع كثير. والميزة هنا لسكان الدقي والمهندسين أنه بـ يوصل طول الـ 24 ساعة.
كل ما هو لبناني موجود في «بيسترو تمارا اللبنانى» اللي فتح فرع جديد له في سيتي ستارز السنة دي. كانت تجربتنا في إفطار ثاني أيام شهر رمضان، ولحسن حظنا جربنا كل الأكلات اللي بـ يقدموها تقريبًا في البوفيه المخصص للإفطار، وانبهرنا بجودة المقبلات اللبنانية الباردة والساخنة اللي مش كل الأماكن بـ تعرف تعملها بالحلاوة دي، وبعدها جربنا مشاوي تمارا الخرافية؛ كفتة وكبدة وشيش طاووق، وهنا بس ممكن تشرب مشروبات زي الجلاب والخشاف اللبناني، وتحلي بالغزل البيروتي والكنافة النابلسية. هـ تنسى مع الوقت أنك داخل سيتي ستارز مع المزيكا والقعدة الحلوة واليونيفورم المميز لفريق العمل والخدمة الراقية، كلها عوامل خلتنا نعتبر «بيسترو تمارا» من أفضل المطابخ اللبنانية في مصر، وأكيد في قائمة الأفضل لـ 2013.
المعادي كان لها نصيب معانا في قائمة الأفضل السنة دي، والمشاركة كانت عن طريق مطعم «ليتل سويس – Little Swiss» اللي هو فعلاً اسم على مسمى؛ قطعة صغيرة من سويسرا فى شارع 254 بمنطقة دجلة بالمعادى، المطعم بـ تمتلكه وتديره سيدة سويسرية اسمها تشارلوت تينتر، وبـ يقدم فوندو وراكليت ولحوم مشوية، لكنه مش عجبنا بس لمجرد أنه سويسري ومميز، لكن لأن كل التفاصيل هنا حلوة بجد. رغم المساحة الصغيرة للمكان ووجوده في منطقة شبه منعزلة إلا أن له شخصية فريدة تخلينا نروح له مخصوص أكثر من مرة ونرشحه كواحد من أجمل مطاعم وبارات العاصمة. جبن الفوندو هي الأكلة المميزة لدولة سويسرا مش هـ تلاقيها بالروعة دي في أي مكان ثاني في مصر، والفوندو الشوكولاتة كمان لا مفر منه بعد الأكل، علشان تبقى عشت التجربة السويسرية كاملة. هـ تحب قعدة «ليتل سويس» ولو لسه ما روحتش ننصحك تروح في أجازات رأس السنة.
واحد من أهم مطاعم السي فوود اللي اكتشفناها مؤخرًا، واحتفينا ببدء ظهور مطاعم أكلات بحرية بجودة ممتازة في مدينة السادس من أكتوبر، وزرنا المطعم الموجود بالحي المتميز بالقرب من جامعة مصر للعلوم والتكنولوجيا. مطعم «البحار» بـ يأخذ وقت على ما يحضر الأوردر ده أكيد، بس في النهاية الأكل لما بـ ينزل بـ ينسيك وقت الانتظار الطويل وهـ تتلذذ بأحلى كنافة بالجمبري وأرز البحار بكل فواكة البحر، مع أصناف الأسماك اللي بـ يسويها حسب رغبتك. هواة المحار والكابوريا هـ ينبسطوا أكثر هنا لأنهم بـ يعملوها بطريقة خاصة بهم، بالثوم والبهارات والخلطة السرية، تقريبًا دي من أهم الحاجات اللي بـ ترفع تقييمنا للـ «البحار» بالإضافة لقعدته المفتوحة الظريفة وإمكانية تدخين الشيشة بعد أكلة السي فوود الرهيبة.
شعار المحل كان بسيط ومباشر جدًا؛ أكل بيتي ومسبك تأكل صوابعك وراه.. وتقريبًا ده اللي حصل في زيارتنا لمطعم «أم محمد» الموجود في التجمع الخامس في أحد الشوارع المتفرعة من شارع التسعين الرئيسي. محاشي وحمام وفراخ محشية بالفريك وطواجن مسقعة وبط وكوراع وفتة وممبار وكل أكلة مصري تخطر ببالك. قعدات عربي قريبة من الأرض وديكورات جذابة من الأرابيسك وموسيقى هادئة وشاشات كبيرة وجو مثالي لتناول وجبتك وكأنك في البيت. فيه جزء في المنيو للأكلات المغربية لكن ما كانش شغال وقت زيارتنا، نتمنى أنه يكون اشتغل وقت كتابة المقال ده، لأن الشيفات هنا ما بـ يهزروش، وبـ يعملوا أكل بجد يُدَرَس.
ملك الفول والطعمية ووحش الباذنجان والبطاطس وغول البيض المقلي والمخلل، ما يغركش أنه اسمه «الجحش»، ده أشهر من نار على علم ومن معالم منطقة السيدة زينب السياحية، لو رمضان جاء وما تسحرتش عنده هـ تحس أن ناقصك حاجة، لو فطرت عنده يوم قبل الشغل تأكد أنك هـ تبقى في أحسن حالاتك طوال اليوم. زيارتنا للـ «الجحش» كانت نقطة فاصلة في تاريخ كايرو 360 قررنا بعدها أننا نولي اهتمام أكبر لعربيات الفول والكشري والكبدة والسجق اللي بـ تطلع مواهب عبقرية في عالم الطبخ والأكلات السريعة على الطريقة المصرية. يا ريت السنة دي ما تعديش عليك من غير ما تكون جربت طبق فول بالزيت الحار من عند «الجحش».
من الفول إلى السوشي ومطعم «دونبوري» الموجود في أكبر مولات العاصمة سيتي ستارز. مش مجرد مطعم سوشي بـ يسعى للشهرة واستقطاب الطبقات الراقية وهواة الأكلات الآسيوية العجيبة، لكن هو مطبخ محترم بكل ما تحلمه الكلمة من معاني، تجربة ما تتنسيش لكايرو 360 في مكان أنيق بـ يقدم الأطباق اليابانية والسوشي والشوربات والمقبلات بمنتهى الحرفية، مع أجواء لطيفة وديكورات خلابة حولك علشان تكتمل تجربتك الجمالية في دونبوري اللي يستاهل مكان أحسن من اللي هو فيه داخل المول، لأنك بصعوبة هـ تأخذ بالك منه.
كل عام وحضراتكم معانا وإحنا معاكم وبـ نكتب لكم عن كل جديد في قاهرتنا العظيمة.. وسنة جديدة سعيدة إن شاء الله.
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
