The Definitive Guide to Living in the Capital , Cairo , Egypt

من أكثر من سنة كان لنا زيارة لفرع «تري بون – Trés Bon» الموجود في تيڤولي دوم في مصر الجديدة، ومن كام يوم مرينا من جنب الفرع الثاني الموجود في شارع غرناطة بالكوربة وعجبنا شكله من الخارج وشد انتباهنا أكثر من فرع تيڤولي، أولاً لأنه في شارع هادئ تمامًا ومافيش أي محلات ثانية جنبه، وثانيًا علشان اللون الأبيض لديكورات المحل وإضاءته الخارجية الساطعة اللي بـ تخليه ظاهر بقوة وسط الظلام والهدوء اللي حوله. ولأننا روحنا قبل وقت حظر التجوال بساعتين بالضبط، عرفونا أن المكان بـ يقفل قبل الحظر بساعة ونصف، يعني كان أمامنا نصف ساعة بس نأكل ونشرب فيها ونستكشف المكان، لكن الغريب أننا بعد ما قعدنا شوية لاقينا ناس كثير بـ تيجي بعد الميعاد اللي هم قالوا هـ يقفلوا فيه وقاعدين وبـ يطلبوا عادي جدًا ومش باين أن المحل بـ يستعد للإغلاق ولا حاجة، ففهمنا أن هم بـ يقولوا أنهم هـ يقفلوا بدري كإجراء احترازي علشان لو حصل حاجة، إنما بالفعل هم ممكن يقعدوا ساعات أطول شوية.

فيه مساحة خارجية كبيرة للجلوس، كلها شيشة ودوشة وزوار المكان أغلبهم من سكان هليوبوليس والأماكن المحيطة، واضح من الأريحية والبساطة اللي بـ يتعاملوا بها مع المكان، ولاحظنا الإقبال الكبير على الشيشة والكوكتيلات والأسبريسو، يعني الناس بـ تتعامل مع الجزء الخارجي من المحل ده على أنه كافيه وبس تقريبًا. داخل المحل مساحة معقولة مكيفة مكونة من طابقين، قعدات فخمة ومريحة وموسيقى بوب وروك ظريفة طوال الوقت وشاشات تليفزيون وديكور باللون الأبيض والبني واضح عليه الحداثة والعناية بالتفاصيل.

مطبخ عالمي يميل للطابع الفرنسي في نوعية الأكلات وأسمائها وطريقة تقديمها، والمنيو متنوع وتقليدي إلى حد كبير، فيه أطباق اللحوم والدجاج والأسماك وفتات ومقبلات غربية وشرقية وسلاطات وساندويتشات وباستا وبيتزا وكل مشروبات الكافيه العادية بالإضافة للحلويات والشيشة طبعًا. هـ نرشح لك الوجبة اللي إحنا طلبناها بالضبط لأننا مش أول مرة بـ نزور ومتأكدين أن اللي إحنا طلبناه كان من أجمل الأكلات في المحل، واستمتعنا به لأقصى درجة. طبق شيف سلاد (38 جنيه) فيه أصابع الروست بيف والدجاج المدخن والشيدر مع الخس والخيار والجزر الزيتون ودريسنج الخل، هـ يفتح نفسك تمام، وممكن يشبعك كمان لو مش جعان قوي قوي بـ تعمل دايت.

طبق السوبر فياجرا (72 جنيه) هو طبق سي فوود متنوع فيه جمبري وكاليماري وسمك فيليه كله مقطع لقطع صغيرة ومعمول بخلطة حارة ومالحة شوية ومغطى بالجبنة الموتزاريلا، وممكن تطلبه مع الباستا أو صنفين جانبين من اختيارك، إحنا اختارنا الأرز الأبيض والسوتيه وكان طبق لذيذ جدًا، مافيش عليه ملاحظات غير الملح الزيادة في خلطة السي فوود.

لفت انتباهنا طبق الساشوان بيف (69 جنيه) الصيني الموجود في منيو اللحوم، حبينا نجربه ولحسن الحظ طلع أكثر من رائع، قطع اللحم البتلو مقطعة قطع صغيرة مع الفلفل الملون والبصل والمشروم وصوص الصويا، معمول بحرفنة ولا أجدع مطعم صيني متخصص، مع البطاطس البيوريه المشوية كان طبق مثالي نعتقد أنه من أفضل الحاجات اللي ممكن تأكله هنا وتنبسط. بعد الأكل ممكن تأخذ كوكتيل فلوريدا الشهير (18 جنيه) بالمانجو والفراولة والجوافة أو أي ميلك شيك، الفواكة هنا فريش والعصائر سكرها مضبوط، وجربنا كمان الآيس كريم (27 جنيه) اللي فيه 3 بولات وواضح أنه جاهز مش معمول داخل مطبخ «تري بون» بس المهم أنه كان حلو.

الخدمة سريعة بجد، كل حاجة طلبناها نزلت أمامنا بعد 10 دقائق أو أقل، والجرسونات محترفين ومركزين تمامًا، والمكان معتنى به ونظيف وما كانش فيه حتى هفوات من طاقم العمل، انبسطنا بتجربتنا جدًا في «تري بون» المرة دي، وقدر يغير فكرتنا بعد تجربة أقل في الجودة في فرع تيڤولي دوم.