The Definitive Guide to Living in the Capital , Cairo , Egypt

كفكرة جديدة لازم نقول أنها حلوة.. أن يبقى فيه برنامج متخصص فى الأكل “المغربى” لكن غبار التجربة الأولى دائمًا بـ يغطى على الفكرة الحلوة للبرنامج.

نادية سرحان مغربية أصلًا.. وبـ تعشق حاجتين: مصر والأكل المغربى وأحلى هدية ممكن تقدمها لها هى شوية توابل مغربية، لو تكلمنا عن نادية الشيف هى طباخة شاطرة بـ تعمل أكل شكله حلو وطريقة تقديمه جديدة بس تحس أن البرنامج ناقصه شوية فلفل وشطة، عارفين المثل الشعبى اللى بـ يقول: “هـ نبوظ الطبخة علشان بقرشين ملح”.

علشان كده إحنا بـ نقول: مهم أن الشيف يكون بـ يعرف يطبخ بس فيه حاجات بـ تخدِّم على حاجات، مثلًا نادية بـ تعمل الأكلة من غير ما تقول إيه فايدتها ولا إيه تأثير سعراتها الحرارية على الجسم والحاجات دي يعنى.

عمومًا لازم برضه نبص على الأنواع الجديدة من الأكل زى سلاطة الفلفل المشوى، فخدة ضانى، لحمة بالقراصية.. ودول من أشهر الأكلات المغربية اللى بـ تتعمل فى العزومات.. وطبعًا ده عرفناه من نادية سرحان.

من أهم الملاحظات اللى هـ تطلع بها لما تتفرج على البرنامج -أن عندنا فى المغرب- أيوه أيوه.. دي مش غلطة ولا حاجة، ما هو من بساطة نادية وطريقة عرضها السهلة.. لازم تقول عندنا فى المغرب.. المهم من أهم الملاحظات أنك هـ تتعرف على أسرار المطبخ المغربى.. وأنك لازم لما تعمل الأكلات دي وأنت قاعد مع أصحابك بـ تحكى عن اللحمة بالقراصية تقول عندنا فى المغرب بـ نعمل لحمة بشكل مختلف.

ولو عملنا مقارنة بسيطة بين الأكل المصرى والمغربى هـ نلاقى أن عندنا فى “مصر” بـ نأكل الكسكسى بالسكر ونادر لما نأكله حادق بالخضار واللبن واللحمة زى المغاربة.. وإحنا كمان بـ نستعمل التين المجفف فى الحلويات وخشاف رمضان.. لكننا اكتشفنا حاجة جديدة من البرنامج وهى أن التين بـ يدخل فى معظم الطواجن واللحوم.

وقبل ما نمشى لازم نقول لكم أن المخرج مهتم بالبرنامج، بـ يجيب كذا مستوى للرؤية وبـ يركز على التفاصيل.. والديكور زى باقى البرامج تقريبًا ثابت مطبخ حلو وشيك والألوان بـ تتغير.. ومن ضمن الديكور اللى لازم نأخذ بالنا منه الزى المغربى الجميل جدًا.. واللى مافيش اثنين يختلفوا عليه لكنه غير مناسب للوقفة فى المطبخ.. يعنى كُم العباية الطويل ساعات بـ يقع فى الأكل ده غير أنه خطر علشان البوتاجاز وكثير قوى بـ يربكها وهى واقفة، لكن فى الآخر لازم نقول أنها بجد شاطرة ومرتبة فى مطبخها وابقوا اتفرجوا عليها.