The Definitive Guide to Living in the Capital , Cairo , Egypt

الغناء الشعبى واحد من أهم روافد الثقافة فى أى بلد من البلاد، يعنى لو حضرتك قرأت عن أى بلد وعاوز تتعرف عليها يبقى لازم تقرأ عن فنونها الشعبية.. هنا لازم نعرف أن الغناء الشعبى اللى فى الأفراح فن جديد على ثقافتنا وأصل الغناء الشعبى المصرى له جذور بعيدة عن أغانى الفلاحين والعمال والبنايين والصيادين.. وأغانى الأفراح والسبوع والحنة هـ نلاقى الموال والمربعات والسير الشعبية وأشكال كثير لسه موجودة لحد وقتنا ده فى القرى البعيدة.

هنا نرجع إلى البرنامج اللى بـ يبدأ بأغنية لكل ضيف ودخلة من جنب المسرح والكاميرا ماشية معاه لحد ما يدخل.. ويقابله الجمهور بتصفيق كبير يعنى مافيش فرق بين مغنى معروف أو واحد غير معروف كلهم بـ يُصفق لهم.. سواء كان صوتهم حلو أو ما يتسمعش.. سواء كان بـ يغنى أصلًا أو لأ.

المهم هنا نيجى للفاصل الأولانى واللى بـ نبدأ بعده فى مجموعة من الأسئلة لمقدمى البرنامج الوقورين جدًا والمختلفين عن روح المغنيين الشعبيين إلهامى مقار وميريهان حسين، ولنا هنا وقفة..

الأسئلة ساعات بـ تبقى عادية ما بـ تقدمش جديد لكنها ساعات بـ تكشف مفاجآت زى عبد الباسط حمودة اللى أخذ فى أول فرح له “ربع جنيه” وأن عائلته كلها بـ تغنى شعبى وعن أن عمره ما اشتغل حاجة ثانية غير أنه بـ يغنى شعبى.. أو مثلاً أن محمود الليثى خريج كلية هندسة.. لكن عمره ما اشتغل مهندس وقرر يبقى مهندس شعبى..

والبرنامج بـ يكشف للى يركز طبعًا طبقات صوت كل مغنى والغريب بقى أن نسبة كبيرة منهم صوتهم حلو فعلاً خاصة اللى بـ يغنوا مباشرة فى البرنامج.. لأن اللى بـ يركز برضه هـ يلاقى أن فيه ضيوف بـ يبقوا مسجلين أغنياتهم وبـ يحركوا شفايفهم بس Play back.. ولما بـ يسخن البرنامج بـ يبدأ كل ضيف يتكلم عن أصدقائه فى المجال طبعًا فيه ناس الكل بـ يتفق عليهم زى المغنى القدير “عدوية” لكن ساعات المغنيين بـ يكشفوا بعض ويحكوا أن المغنى الفلانى كان شغال معايا فى الفرقة “مطبلاتى” لكن الدنيا فتحت له ذراعاتها وبقى مشهور.. وإييييه دنيا.

الفقرات معروفة فى البرنامج هى غناء وأسئلة وبـ ييجى آخر الحلقة اثنين من الشباب الموهوبين ويغنوا أمام اللجنة اللى بـ تبقى مختلفة كل حلقة طبعًا مع اثنين ثابتين هما المخرج أحمد السيد والملحن كريم عرفة.. لكن البرنامج روحه واحدة يعنى مافيش مجال للتغيير ويوم ما يحبوا يغيروا بـ يخلوا اثنين من الضيوف يقوموا يغنوا مع بعض.. العجيب بقى أن أحيانًا تلاقى مغنية شعبية قررت تعمل استعراض مع الأغنية.. وطبعًا الموضوع مش بـ يبقى استعراض خالص هو ببساطة بـ يبقى حاجة من اثنين: رقص بلدى خالص (راجع قناة التت علشان تعرف قصدنا إيه)، إما رقص أفراح (وهو نوع مستحدث لا يمت للرقص بصلة يعنى شوية حركات مع بعض منها اللى لها مغزى ومنها اللى لأ).