دليل كايرو 360 لأهم المطاعم الإيطالية في القاهرة
Cairo 360
سلسلة موضوعات خاصة هـ نبدأ في نشرها من النهارده بـ تتكلم عن كل مطبخ من المطابخ المهمة في القاهرة وهـ نذكر أهم 10 مطاعم بـ تقدم أكلات المطبخ ده وطبعًا بعد ما نكون جربناها وزرناها وعرفنا أنها بـ تعمل الأطباق دي أحسن من غيرها. نوعدكم كل فترة هـ نعمل موضوع خاص -زي ده- نتكلم فيه عن المطاعم الجديدة اللي ظهرت وتخصصت في مطبخ معين بـ نرشحه لكم زي المطبخ الهندي والصيني واللبناني والسوري والمكسيكي والمصري والأمريكي.
البداية مع واحد من المطابخ المفضلة جدًا لسكان القاهرة ولنا إحنا في كايرو 360 بشكل خاص، المطبخ الإيطالي يعني بيتزا ولازانيا وكالزوني، يعني سباجيتي وبِنا وفوسيلي، المطبخ ده فيه كل حاجة حلوة بـ تطلع مخبوزة من الفرن، وتُقدم ساخنة مولعة مع شرائح ملونة من الفلفل والطماطم، وصوصات الكريمة والطماطم والبصل، المطبخ الإيطالي رائع بمعنى كلمة رائع، والأهم من كده أن أكلاته أسعارها حنينة وسهل تلاقيها في كل حتة؛ من أرقى الفنادق لأصغر محلات الفطير، من أهم الشوارع الرئيسية لأضيق الحواري في المناطق الشعبية، هـ تلاقي بيتزا ومكرونة بصوصات إيطالي على مصري، في النهاية الأكلة أصلها إيطالي.
أول طلعة لازم تبقى على مطعم له عشاق ومعجبين كثير، فروعه في مصر الجديدة ومدينة نصر ومساكن شيراتون، البداية كانت بفرع واحد وبدأ يتطور وقاعدة زبائنه بـ تكبر ونجح بالبيتزا العملاقة “الحجم الكبير” المغطاة تمامًا بالموتزاريلا وكميات الإضافات غير العادية ونجح أنه يخلي الناس تلف تلف وترجع له ثاني علشان أحلى بيتزا الباتشينو بالرومي المدخن والركفورد، واللازانيا كمان هنا حكاية، بس هـ تستناها تبرد ربع ساعة على الأقل علشان تعرف تأكلها. أحلى حاجة في «بيسترو» أنك هـ تقعد وتأكل في المحل ومش هـ تدفع غير ثمن الأطباق اللي طلبتها بدون إضافة خدمة أو ضريبة.
من مصر الجديدة ومدينة نصر نروح لمدينة الشيخ زايد وواحد من سلسلة مطاعم لو باشا الموجودة في الزمالك، «بيكولو موندو» موجود كمان في أركان مول الشيخ زايد. المكان له طابع إيطالي واضح في كل تفاصيله حتى المزيكا اللى شغالة إيطالية أصيلة. هنا ممكن تأكل أحلى سكالوبيني بصوص الليمون، شرائح بيف مقلية على الطريقة الإيطالية ومعاها شوية سوتيه وبطاطس، وبعد الأكل ما تنساش تجرب منيو الحلويات وبالذات فوندو الشوكولاتة اللي عجبنا جدًا لما جربناه في آخر زيارة لنا.
غني عن التعريف، صحيح «سبكترا» بـ يقدم أطباق عالمية ومتنوعة لكن نقدر نعتبره مطبخ إيطالي في الأساس، لأنك مش هـ تقدر تقاوم تطلب الباستا أو كومبو المقبلات اللي فيه أحلى موتزاريلا ستيكس وحلقات الكاليماري المقلي. القعدة في «سبكترا» لها مذاق خاص بعيد عن المنيو الجبار. له فرعين في سيتي ستارز فى الدور الأول والسادس، وبـ نفكركم كمان أن له فروع في المهندسين والتجمع الخامس وشارع الهرم والمعادي.
في وسط البلد في باب اللوق، ملك المكرونة بالسي فوود، مطعم فريد من نوعه وحقق نجاح وانتشار رهيب والناس بقت تيجي له من آخر الدنيا، الباستا الإيطالية بالسي فوود هنا اختراع، بنا أو سباجيتي بصوص المحار والكابوريا عليها كمية مش معقولة من الجمبري والكاليماري. القعدة هناك بسيطة لكن عصرية، هـ تحب تأخذ كومبو المكرونة بتاعك وتقعد تنأنأ فيه وأنت في منطقة حيوية جدًا في وسط البلد. الأسعار بـ تختلف حسب الحجم لكن الأصناف محددة وصريحة، باستا بالمأكولات البحرية هي الأساس، ومؤخرًا بقى فيه باللحم والدجاج.
نرجع ثاني للشيخ الزايد، المرة دي في تيفولي دوم، وواحد من أشهر المطاعم في عالم الأكلات الإيطالية وهو «كارينوز» اللي قعدتنا فيه وأجوائه الإيطالية جدًا عجبتنا أكثر من أي حاجة ثانية، يمكن علشان إحنا أصلًا بـ نحب تيفولي دوم، ويمكن علشان لنا ذكريات حلوة مع الفروع الثانية لكارينوز. هنا جرب أي فيليه بصوص المشروم أو الليمون مع السيسيليان ستيكس الحارة.
أكل إيطالي على قدر كبير من الخصوصية، الشيف المصري اللي عاش فترة طويلة في إيطاليا وبـ يرجع يفتح مطعم الأحلام بالنسبة له ويقدم لنا خلاصة خبرته في طبق لازانيا فكرة جديرة بفيلم عربي مؤثر. دي تقريبًا قصة صاحب مطعم «بيتزاريللي» في مصر الجديدة، الموجود في ميدان الإسماعيلية الكلاسيكي المفضل لكل سكان مصر الجديدة. مكان حلو في القعدة والمنيو وكل حاجة، محافظ على إيطاليته شكلًا ومضمونًا، جربنا هنا سلاطة إيطالية بالزبادي والمايونيز وسباجيتي بولو ما حصلتش. المذاق رائع وهـ تحس بالأصالة في كل أطباق المحل، وفيه هنا منيو إفطار فيه معجنات إيطالية خطيرة.
لما تحب تطلب بيتزا إيطالية حقيقية وأنت قاعد في البيت، عليك وعلى «دا فرانكو» المتخصص في البيتزا “البيتي” يعني كأنك بـ تأكلها في بيت في إيطاليا. المحل موجود في المهندسين وبـ يعمل دليفري وبس، لكن البيتزا عنده غير أي بيتزا، نقدر نقول عليها صحية أو تنفع للدايت، المهم أنها مليانة خضروات وخالية تقريبًا من الدهون، والجبن قليل جدًا، بس ما ننكرش أن طعمها عجبنا، وعجبنا مستوى الخدمة والسرعة في التوصيل. ممكن تبقى من ضمن اختياراتك لما تطلب معاك أكل إيطالي غير تقليدي.
مافيش حد بـ يحب الأكل الإيطالي ما يعرفش «لاكازيتا» فروعه مغطية كل حتة في القاهرة، بـ نحب نأكل فيه علشان نستفيد بعملة لاكازيتا الورقية اللي بقيمة 5 جنيه اللي بـ تأخذ منها بنسبة معينة من قيمة فاتورتك في كل مرة وكل ما نجمع شوية عملات نروح نأخذ واحدة بيتزا ع السريع. طبعًا فكرة ترويجية ممتازة بس ده ما يمنعش أن الأكل هنا روعة، والأجواء الكلاسيكية والراقية جدًا للمكان بـ تخلينا نشتاق له من وقت للثاني ونبقى عاوزين نأكل بيتزا وسباجيتي بولونيز من عنده هو دون عن أي مطعم إيطالي ثاني.
مافيش فوود كورت تقريبًا في أي مول مافيهوش أكلات إيطالية، لكن تعودنا لما نبقى في مول ندور على «ميركاتو ايطاليانو» تحديدًا. أسرع أكل إيطالي في مصر، كل الأكل معروض أمامك في كاونتر كبير، شرائح البيتزا الكبيرة والأرز بالخضروات وكرات اللحم والدجاج بالكريمة والليمون، أطباق مميزة جدًا عند ميركاتو، بس السترومبولي هنا حاجة ثانية، أحلى وأكبر فطيرة محشوة إيطالية، ما ينفعش تيجي هنا من غير ما تجربها، ومع أي وجبة لازم تأخذ سلاطات الهاوس سبيشيال الفريش، ما تتفوتش.
مسك الختام «ديدوز آل دنتي» بفرعيه في الزمالك ومصر الجديدة. فرع الزمالك هو الأصلي، رغم مساحته الصغيرة جدًا إلا أن الإقبال والزحام فيه غير عادي، علشان عنده طبق بِنا ألافورنو هو الأفضل في القاهرة، وبعد كده تيجي البيتزا واللازانيا وبعض أطباق السي فوود بالطريقة الإيطالية المتخصصة جدًا. ديدوز من مطاعمنا المفضلة في كايرو 360 ومش بـ نفوت فرصة نكون في الزمالك إلا وندخل نقعد نسمع شوية مزيكا حلوة ونعيش أجواء إيطالية صميمة.
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
