The Definitive Guide to Living in the Capital , Cairo , Egypt

المحل موجود في شارع الميرغني في مصر الجديدة، جنب معارض أبو غالي موتورز، والمحل في الدور الثاني ولازم تدخل مدخل العمارة وتطلع السلالم علشان توصل له. مساحته من الداخل مش كبيرة خالص؛ كأنها شقة بغرفتين، واحدة معروض فيها البول أوﭭر والجاكت وﭭاترينة عرض زجاجية فيها ساعات ونظارات وbracelets معدنية، والغرفة الثانية للجينز والقميص والتي شيرت.
هـ تلاقي تشكيلة ضخمة من البول أوﭭرات الصوف والتريكو والقطن الخفيفة عليها علامات بيربري وأمريكان إيجل وبولو، لكن ما تركزش في الماركات وركز في الموديلات اللي هـ تلاقيها أنيقة لأقصى درجة، والألوان واضحة والتفصيلات مضبوطة وجميع المقاسات موجودة، المفاجأة لما تعرف أن فيه خصم بـ يوصل لـ 50 % على عدد كبير من المعروضات في المحل، يعني البول أوﭭر اللي عجبنا جدًا عرفنا أنه بـ 100 جنيه بدل 200 جنيه، وكذلك الهووديز والسويت شيرت التومي اللي بسوستة من الأمام، بنفس السعر، تقريبًا مستحيل تلاقي حاجة زي كده وبالجودة دي بالسعر ده، بس عرفنا أن التخفيضات مش محددة بمدة وأن الأسعار ممكن تتغير في أي لحظة، بس حتى لو الأسعار الموجودة مغرية جدًا ولازم هـ تلاقي حاجة تناسب ذوقك.

الأحذية واضح أنها من أحسن المعروضات في المحل، ماركات مش معروفة بس تشبه الـ vans والموديلات الإيطالية الكاجوال من خامات الشامواه والجلد المقلوب، وفيه هاف بووت ببوز رفيع شيك جدًا ومش بـ نلاقيه في أي حتة، وألوان غير معتادة زي الأزرق والبترولي، والموديلات دي كانت داخلة في التخفيض وأسعارها بقت 200 جنيه بدلاً من 300 و250 جنيه. وفيه رف واحد بس عليه مجموعة من الأحذية الأقرب للكلاسيكية دي خارج التخفيضات لأنها لسه واصلة المحل.
نظارات Ray-Ban  وPesrol وCarrera بأسعار من 300 لـ 600 جنيه، وساعات CK وEsprit بأسعار من 450 لـ 900 جنيه. صحيح كل تقليد بس مش أي تقليد، وخلينا واقعيين ونعترف أن في النهاية كله معمول في الصين، المهم عمرها يكون طويل، إنما بالنسبة للأناقة والستايل مافيش أي فرق بينها وبين الأصلية. فيه عدد من إكسسوارات الرجال زي الخواتم والـ bracelets والكابات وبرنيطة شيرلوك هولمز الشهيرة بأسعار من 40 لـ 60 جنيه.