The Definitive Guide to Living in the Capital , Cairo , Egypt

آخر دليل أسبوعي هـ نكتبه في 2012، وده مش هـ يبقى بس للويك إند لكن هـ نكتب فيه أهم الحفلات والأحداث الخاصة بليلة رأس السنة. حدد موقعك على خريطة القاهرة في الأيام اللي فاضلة في 2012 وأكيد هـ تلاقي حاجة بـ تحصل قريب منك لها علاقة بالسنة الجديدة والكريسماس. ده بالإضافة لعدد من الأحداث الثقافية والحفلات الموسيقية والمعارض والندوات.

نبدأ بالنهارده أو بالتحديد دلوقت حالًا، والندوة اللي بـ يديرها المجلس الأعلى للثقافة بعنوان الدين والسياسة في مصر على مر العصور في قاعة المؤتمرات بالمجلس الأعلى للثقافة وتتضمن الفعاليات خلال يومين عدة ندوات تناقش العلاقة بين الدين والسياسة وتأثيرهم على صناعة القرار في الدولة المصرية على مدى العصور. الندوة بدأت الساعة 11 صباحًا ومستمرة لحد الساعة 5 مساءً. وبكرة كمان في نفس المواعيد. بـ نرشحها لكم بقوة لأهميتها في رأينا.

النهارده بالليل هـ يكون فيه حفل موسيقي مميز جدًا بالنسبة لنا وهو حفل تريو الفنان عمرو صلاح لموسيقى الجاز ومعه المغنية نهى فكري. الحفل في ساقية الصاوي في قاعة الحكمة وهـ يبدأ الساعة 8 مساءً. التذكرة بـ 30 جنيه.

وبمناسبة إطلاق ألبومه الأول هـ يقوم مادو بإحياء حفل غنائي على مسرح قاعة النهر في الساقية برضه الليلة الساعة 8:30 مساءً وسعر تذكرة الدخول 20 جنيه.

برعاية وزير الثقافة الدكتور صابر عرب ورئيس قطاع الفنون التشكيلية الدكتور صلاح المليجي فيه 3 معارض فنية للفنان أبو بكر النواوي بقاعة أحمد صبري بمركز الجزيرة للفنون، ومعرض ثاني بعنوان “متحف وتمثال” بقاعتي راغب عياد والحسين فوزي، ومعرض الفنانة مروة فوزي بقاعة كمال خليفة، كل المعارض مستمرة لحد 3 يناير اللي جاي.

بعد البداية في فريق Craven، مزيكا شادي البوب- روك وكمان صوته تطوروا علشان يبقى واحد من أكثر المغنيين والمؤلفين موهبة، طارق عبد القوي هـ يكون مع شادي أحمد في مكتبة صوفي بالزمالك علشان تسمعوا أحلى أغاني أكوستك من ألبوم شادي الجديد. الحفل في مركز صوفي بالزمالك وهـ يبدأ الساعة 8 مساءً.

نيجي لحفلات أغاني الكريسماس وهي كثير جدًا الأسبوع ده، وأهمهم حفل أغاني الكريسماس في دار الأوبرا المصرية. مع مجموعة من أبرز الأصوات في الأوبرا، هـ تقدم فرقة أوبرا القاهرة على المسرح الكبير بمشاركة كورال القاهرة الاحتفالي وأوركسترا أوبرا القاهرة بقيادة المايسترو ناير ناجي مجموعة من أشهر أغاني الكريسماس زي أفي ماريا، وعيد الميلاد، وأجراس كارول، والليلة المقدسة وغيرها. العرض من إخراج  عبد الله سعد، والتذاكر متاحة لدى شباك الحجز.

يوم الجمعة الموافق 28 ديسمبر في جاز مايت في الزمالك ليلة أغاني كريسماس بطعم مختلف، أغاني جاز وعشاء راقي وجو حالم ومرح في نفس الوقت. مع نهى فكري ورامي عطالله وأحمد هشام هـ تستمعوا بسهرة موسيقية فريدة. الدخول بـ 75 جنيه.

يوم السبت 29 ديسمبر، وبما أن مع الأحداث الحالية في البلد وحشنا الضحك وغالبًا بقينا شبه مكتئبين، ساقية الصاوي جايبة لكم ستاند أب كوميدي بالعربي علشان نغير الموود شوية. العرض في قاعة النهر، سعر التذكرة 25 جنيه، والدخول 8:30 مساءً.

ترانزيستور هـ تقدم لكم أحلى موسيقى روك واخدة الطابع المصري وبعدهم “سلالم” بكلمات أغانيهم اللي بـ تسخر من أوضاع الحياة اليومية في مصر بمزيكا البوب اللي هـ تملأ الجو فرحة وضحك، الحجز ضروري في كايرو جاز كلوب اللي فيه الحفلة، ما تتأخروش.

يوم الاثنين ليلة رأس السنة وزي كل سنة في ساقية الصاوي هـ يكون حفل الفنان العراقي عازف العود نصير شمة. حفل ساهر وعشاء مخصص لاحتفالية السنة الجديدة. ممكن تتصل وتسأل على التفاصيل في ساقية الصاوي. الحفل في قاعة الحكمة وهـ يبدأ الساعة 10 مساءً وسعر دخول الفرد 65 جنيه.

كل سنة وأنتم طيبين ومش هـ نقول لكم بقى إحنا قد إيه بـ نتمنى 2013 تبقى أحلى والكلام ده كله، بس الأكيد أنها هـ تبقى أحلى لأن مافيش في نظرنا أسوأ من اللي فات. يمكن أحسن حاجة حصلت هي أننا كنا معاكم وكنتم معانا على صفحات كايرو 360. تابعوا أجندة موقعنا وأعرفوا باقي أحداث نهاية الأسبوع وحفلات رأس السنة.