The Definitive Guide to Living in the Capital , Cairo , Egypt

هـ نبدأ بأفضل 10 أماكن تسوق زرناها في كايرو عام 2012، أحسن 10 أماكن بدون ترتيب، يعني رقم 5 مش أحسن من رقم 4 وهكذا..

محل لعب الأطفال المملوك لدكتورة الأسنان الأسبانية كاتالينا كونستين وزوجها الكولومبى إدواردو أورتيز والفنان المصرى إلهامى نجيب. موجود فى المعادى من 3 سنين، وده خلانا نستغرب إزاى ما روحناش هناك قبل كده، لكن زيارتنا له السنة دي غيرت مفهومنا عن شكل محلات لعب الأطفال، خاصة أنها مش مجرد لعب، لكن فيه عدد من التحف واللوحات والأنتيكات.

مستحضرات تجميل ومنتجات صديقة للبيئة وأسعارها ممتازة. محل «نيفرتاري» له أكثر من فرع، لكن زيارتنا السنة دي كانت لفرع الدقي الموجود قريب من «ألفا ماركت». تركيب عطور وزيوت للبشرة. وفيه كمان فواحات بأحجام وأسعار مختلفة. ومن الأماكن القليلة اللي هـ تلاقي فيها صابون جليسرين بالجودة دي.

واحد من أهم محلات الملابس والإكسسوارات اللي فتح مؤخرًا في مصر، في 2012 وصلت محلات «سنتربوينت» العالمية لسيتي سنتر المعادي أو “كارفور المعادي”. المحل عملاق كأنه مول داخل مول، بـ يضم أكثر من ركن للملابس والأحذية، رجالي وحريمي وأطفال، وبعض الإكسسوارات المنزلية. فيه ماركات Splash وبيبي شوب. وفي قسم الديكورات والإكسسوارات هـ تلاقي منتجات من ماركة “لايف ستايل”. معظم المنتجات صناعة هندية وفيتنامية وتايوانية، يمكن لأن السلسلة أصلًا مملوكة لشركة هندية، وهي مشهورة جدًا في دبي ودول الخليج.

علشان لما تيجي رايح مناسبة وعاوز تشتري هدية وتحاول تبعد عن التقليدية. «باتشي» متخصص في الشوكولاتة، وخاصة شوكولاتة الهدايا والزيارات، وبـ يعملها بحشو مبتكر غير عادي. أصله لبناني وفتح مؤخرًا في الزمالك. أثناء زيارتنا عجبنا جدًا مستوى الخدمة وخبرة العاملين هناك. وبعيد عن الشوكولاتة هـ تلاقي إكسسوارت كثير تنفع هدايا للمنزل. زي طفايات السجائر الثقيلة والفازات والصناديق الزجاجية وكلها ممكن تملأها بالشوكولاتة برضه، وممكن تجهز من هنا سبوع الأطفال بالكامل.

رغم وفرة محلات الآلات الموسيقية في الكام سنة الأخيرة، إلا أن جودة المعروضات وخبرة القائمين على المحلات نفسهم كانت سبب في أن مش كلهم قدر ينجح أو ينافس بقوة. وفي زيارتنا لمحل «فلويد» الموجود في ميدان المساحة في الدقي، عجبنا جدًا التنوع الرهيب في المعروضات والأسعار القابلة للفصال دائمًا، وعجبنا فهم موظفين المحل وازاي بـ يحاولوا يرضوا الزبائن، وأهم حاجة أنك هنا مش هـ تسمع كلمة “مش موجود”..أي آلة هـ تطلبها هـ يحاولوا يوفروها لك ولو بعد حين. المكان متميز بالجيتارات والدرامز وآلات الإيقاع، من الآخر جنة مجانين الروك.

محل مش مشهور قوي موجود في مساكن شيراتون في مصر الجديدة، المحل بـ يعرض ملابس على أحدث طراز: فساتين سهرة، وشنط، وأحذية، وإكسسوارات ومستلزمات منزل لمصممين محليين وعالميين. وفيه مستلزمات منزل زى مخدات، وقاعدة للكؤوس، وفوط، وصوانى، ومجّات لمصممين مصريين زى “جود”، و”خمسة وخميسة”، و”كايرويد”، إضافة لشموع من “كاندل كوليكشن”. مكان لوضع ميدالية المفاتيح على شكل مفتاح خشب من “امسكوا الخشب” وحاجات كثيرة مالهاش علاقة ببعض بس العامل المشترك بينهم هو التفرد والأناقة، وأي حاجة تنفع تبقى هدية جميلة. والأسعار معقولة. مكان جدير بالزيارة وكان لازم نلقي الضوء عليه.

زرنا فرع الدقي من منافذ بيع منتجات «مزارع دينا». صحيح أنت ممكن تلاقي منتجات “دينا” في أي مكان لكن هنا أنت في سوبر ماركت متكامل فيه كل ما هو فخر «مزارع دينا» من ألبان وفواكة وخضروات وبيض ومنتجات أورجانيك. وفيه كمان كيك وبراونيز مستورد وأنواع مختلفة من الجبن. عجبنا نظافة المكان والتنوع الكبير في المعروضات وبـ نعتبره من أهم اكتشافاتنا السنة دي.

سلسلة المحلات كندية الأصل اللي أصبح لها فروع في كل دول العالم، فساتين في غاية الرقة والأناقة، وبلوزات وجيبات روعة. «لو شاتو» واحد من أجمل محلات الملابس الحريمي اللي زرناها في 2012، وكانت تجربتنا في فرع مول العرب في مدينة 6 أكتوبر. رغم أن الأسعار مش قليلة إلا أننا متأكدين أن الموديلات اللي هنا فريدة ومش شبه أي حتة ثانية وتستاهل الفلوس اللي هـ تدفع فيها. زوروا الفرع وقولوا لنا رأيكم.

لو حد بـ يربي حيوانات أليفة خصوصًا القطط والكلاب، بـ يبقى عنده مشكلة إزاي يدلع الحيوان اللي عنده، خاصة لو كان حد ما عندوش مانع يصرف مبالغ كبيرة علشان يسعد كلبه أو قطته وشايف أن ده بـ يسبب له السعادة له هو شخصيًا. «إيجي ﭘـاﭘـي» الموجود في دهاليز المعادي مستخبي شوية، بس لما اكتشفناه فرحنا جدًا أن النوع ده من الخدمات للحيوانات موجود في مصر. مأكولات وحفاضات للكلاب وملابس للقطة والكلب من ماركات عالمية! أيوه.. ده حقيقي، بالإضافة للأطواق والإكسسوارات الثانية. وفيه كمان خبراء تغذية. هنا كل حاجة هـ يحتاجها حيوانك الأليف.

أمام جنينة مول في شارع البطراوي المتفرع من عباس العقاد في مدينة نصر، وله فرع ثاني على شارع عباس العقاد الرئيسي. محلات «آخر العنقود» ظاهرة جديدة في عالم التسوق، شهرته أنه كان كاتب على أبوابه “كل حاجة بـ 2.5 جنيه”. كل حاجة صغيرة أو رفيعة ومش عارفين دي ممكن تكون بـ تُباع فين أكيد هـ تلاقيها هنا. ده بجانب المعروضات الرئيسية من الماكياج ومستلزمات التجميل والشامبو ولعب الأطفال والأدوات المكتبية وبعض المفروشات. محل عجيب لكن مغري جدًا، ورغم أسعاره القليلة إلا أنك ممكن تخرج من هناك وأنت دافع مبلغ وقدره من كثر الحاجات البسيطة اللي هـ تعجبك وتشتريها لأنك مش بـ تلاقيها بالأسعار دي في مكان ثاني، ده لو لقيتها أصلًا.

نشوفكم في السنة الجديدة وتابعوا جولاتنا التسوقية واكتشافاتنا الجديدة في كايرو مع بداية 2013، كل سنة وأنتم طيبين.