The Definitive Guide to Living in the Capital , Cairo , Egypt

الشكل هو هو، الكلام ده طبعًا لو كنت تعرف شكل الفرع الرئيسي الموجود في ميدان تريومف في مصر الجديدة، لو ما رحتش قبل كده، فالمكان تصميمه عبارة عن غابة أفريقية مليانة نباتات صناعية مغطية الجدران والسقف، وفيه حيوانات عملاقة “صناعية طبعًا” وزواحف بـ تتحرك حركة ميكانيكية مضحكة، وفيه شلالات وأصوات هدير المياه هـ تسمعها في أي مكان هـ تقعد فيه داخل المطعم، ولحسن الحظ فيه شاشات تليفزيون بـ تعرض المباريات على القنوات الرياضية الخاصة، ودي كسرت جو الغابة شوية اللي رغم أنه مبتكر وغير تقليدي إلا أنه ما عجبناش قوي لأننا حسيناه مفتعل وصناعي أكثر من اللازم، لكن ما استغربناش لما لقينا الناس بـ تدخل مخصوص علشان تتصور مع تماثيل الحيوانات وأمام الشلالات، ولقينا زوار المكان نفسهم بـ يتجولوا في المطعم وبـ يتفرجوا على أحواض السمك والأشجار المعلقة، وده ببساطة لأننا مفتقدين “إحساس الغابة” في مصر، أو لأن النوع ده من الديكورات أو الـ Themes مش منتشر.
أهم من الديكور والحيوانات وموسيقى القبائل الأفريقية اللي هـ تسمعها في المكان؛ الأكل نفسه، والحق يقال «بلانت أفريكا» بـ يقدم أطباق عالمية بجودة مش معقولة، والمنيو بتاعه غني جدًا وفيه بجانب الأطباق والمقبلات والساندويتشات والباستا مجموعة من الحلويات والعصائر والكوكتيلات المبتكرة اللي بـ تخلي الناس تيجي المكان هنا مخصوص.
علشان تكتمل الأجواء الأفريقية طلبنا شوربة الزولو (14 جنيه) وكان فيها حبات فاصوليا بيضاء وحمراء وقطع دجاج، حلوة مافيش كلام، بس الكمية قليلة شوية. طبق مقبلات كبير فيه 3 أنواع من اختيارنا هو الـ Whole Tribe (52 جنيه) كان فيه بطاطس مشوية باللحم المفروم والجبنة الشيدر وسبرنج رولز بالسبانخ واللحم وموتزاريلا ستيكس مع صوصات الباربيكيو والطماطم الحارة والـ Sour Cream. عجبنا جدًا البطاطس المشوية والطبق كله كان خطير ويفتح النفس بجد. احتارنا شوية وإحنا بـ ندور في الأطباق الرئيسية لأنها كثير قوي ومتنوعة وفيها حاجات كثير مميزة تستاهل أننا نجربها، فاستعاننا بصديق وهو الجرسون اللي كان معانا وخليناه يرشح لنا طبق لذيذ من اللحوم وواحد ثاني من الدجاج. وفعلًا كانت ترشيحاته ممتازة، ستيك فيليه بصوص الترياكي (70 جنيه) مع طبق جانبي من الأرز والبطاطس المحمرة، وعلى فكرة الأصناف الجانبية هنا Refill يعني ممكن تعيد ملأ طبقك بها ثاني أكثر من مرة، بس ده لو قدرت تخلص أصلًا لأن الكميات في الأطباق الرئيسية والمقبلات سخية جدًا بعكس طبق الشوربة المحندق. مش هـ نقول أجمل ستيك أكلناه في حياتنا علشان ما نبقاش بـ نبالغ، بس هو فعلًا فوق الوصف، واللحم باين من لونه وطعمه أنه فريش جدًا، مع الأرز بالخضروات وصوص الترياكي المِزز وعيدان البطاطس الرفيعة المقرمشة استمتعنا بالطبق بجد. بازل تشيكن Basil Chicken (52 جنيه) هو طبق من صدور الدجاج المشوية بالأعشاب والريحان مغطى بالجبنة السايحة، لازم تجربه مع السوتيه والبطاطس البيوريه المغطاة بالجبن الشيدر برضه، الكمية كبيرة والطعم رائع والسعر ممتاز بالنسبة للكمية.
الـ Shugee هو طبق الحلو اللي اختارناه وده فيه كيك محشو بشوكولاتة الفادﭺ مع بولة آيس كريم فانيليا وقطعة أناناس (30 جنيه). حط الآيس كريم المثلج على فادﭺ الشوكولاتة الساخن واستمتع بأحلى طعم في الدنيا. سيبك من الأناناس لأنه كان كمبوت وواضح أنه مش فريش كمان. نفس الكلام بالنسبة لكوكتيل سمر بانش Summer Punch (18 جنيه) اللي كان كل الفواكة فيه محفوظة وطعمها مش فريش ماعدا قطع التفاح، وسيرب العنب الأحمر هو اللي كان حلو بس في الكوكتيل.
الخدمة ممتازة ومحترفة والمكان نظيف وفيه ساحة لعب ومراجيح للأطفال، والأهم من ده كله أن فيه حمام خاص بالمكان على غير عادة المطاعم الموجودة داخل المول. «بلانت أفريكا» اسم كبير وله محبيه وكسب زبائن جديدة بفرعه الجديد في سيتي ستارز.