The Definitive Guide to Living in the Capital , Cairo , Egypt

مطعم له باع طويل في عالم البيتزا والباستا والوجبات
السريعة، تجربتنا معاه بدأت مع فروعه اللي في مساكن شيراتون وفي مدينة نصر، وكتبنا
عنه مقال قبل
كده واتكلمنا عن المنيو المميز والأسعار المغرية اللي بـ يقدمها مطعم «بيسترو»
اللي شبه متخصص في الأكلات الإيطالية. لكن الفرع الجديد اللي بـ نتكلم عنه
النهاردة مختلف تمامًا عن الاثنين الآخرين، والتميز هنا بسبب موقعه الخطير وشكل
المبنى الجذاب جدًا من الخارج ومساحته الكبيرة من الداخل ومستوى الخدمة اللي تَقدم
جدًا في المطعم. يعني نقدر نقول أن «بيسترو» عمل نقلة نوعية في مستواه وبدأ ينافس
قطاع أقوى من المطاعم والكافيهات وهـ نشرح أسباب ده بالتفصيل.

المبنى العريق اللي تحول لمطعم «بيسترو» موجود في ميدان
الإسماعيلية في شارع عمر بن الخطاب في مصر الجديدة، مبنى شبه القصور القوطية الأوربية
وملحق به ساعة ضخمة زي ساعة بيج بن (بس مش في حجمها طبعًا) ومكون من 3 طوابق أول
دورين منهم مخصصين للطعام، والدور الثالث عبارة عن روف أو تراس مفتوح وله منيو خاص
به فيه مشروبات وحلويات وأكلات خفيفة أو سناكس، والقعدة فوق تحفة ومنظر الشارع
الهادئ اللي بـ تبص عليه حلو ومريح للأعصاب. ويمكن دي نقطة التحول في شخصية «بيسترو»
وهي القعدة الرومانتيكية اللي على تراس الفرع ده، ورغم أن ده ممكن ما يعجبش بعض
رواد المطعم؛ إلا أننا عجبتنا فكرة عدم تقديم المنيو العادي على التراس وتخصيصه
للمشروبات والحاجات الخفيفة (اللي من ضمنها بيتزا برضه بس حجم صغير) وده لضمان
الحفاظ على الطبيعة الشاعرية للمكان، وإحنا عارفين أن الأكل ممكن يفسد أي شاعرية
لو أسيء استخدامه! وديكور المكان من الداخل هو نفسه في كل الفروع بصور النجوم والمشاهير
على الجدران واللون الخشبي والبرتقالي في الأثاثات والإكسسوارات، جذاب ومريح
للعين.

المنيو زي ما قولنا عالمي غالب عليه الطابع الإيطالي؛
بيتزا بـ 3  أحجام وكل الأنواع بأسعار من
20 لـ 50 جنيه، وكل أنواع الباستا باللحوم والدجاج والسي فوود بكل الصوصات بأسعار
من 25 لـ 30 جنيه، وفيه اللازانيا والباستا الـ Home Made بـ 25 جنيه، وفيه ساندويتش برجر
ما حصلش اسمه ديابلو برجر الكومبو بتاعه بـ 23 جنيه، بس رغم أن حجم الساندويتش ضخم
بجد، وفيه ساندويتشات دجاج وسلاطات وشوربة اليوم وبعض الأصناف الجانبية. المطعم
عنده وجبات بـ تتكون من طبق رئيسي وصنف جانبي وسلاطة، وممكن تكون وجبتك حسب رغبتك
وباختياراتك من 3 قوائم هم بأسعار 35 و40 و50 جنيه. بس مشكلة الوجبات دي أنك ممكن
تبقى عاوز صنفين من نفس القائمة وتستغنى عن قائمة من الـ 3 لكن نظام المطعم مش بـ
يسمح بده حتى لو هـ تدفع فرق الفلوس الزيادة.

لازم تفتتح ببار السلاطة (12 جنيه) وخاصة سلاطة التونة
اللذيذة والكول سلو. جربنا بيتزا الباتشينو بالرومي المدخن والريكفورد والدجاج
والملفت أن الريكفورد كانت قليلة جدًا أو تكاد تكون معدومة. سوبر بيف لازانيا (25
جنيه) هي أحد اختيارتنا المفضلة في «بيسترو» وكانت حلوة كالعادة ومليانة سلامي
وبيف وهوت دوج. من الوجبات جربنا الفيليه ستيك بالبيبروني والجبن الشيدر ومعاها
أرز بالخلطة وسلاطة خضراء (50 جنيه)، الأرز والسلاطة حلوين ويفتحوا النفس، اللحم
بقى كان شبه البرجر كثير في التتبيلة بتاعته وشكله كمان، والجبن الشيدر كان محطوط
قطع سليمة مش سايحة على اللحم، وإضافة البيبروني ما كانتش اختراع يعني، ياريت
يعيدوا النظر في الطبق ده ككل، ومع ذلك طعمه ما كانش بطال.

الخدمة سريعة ومحترفة بفعل الإقبال الكبير على المحل،
والأكل بـ يجهز بسرعة ودي أهم حاجة، والمكان شيك ونظيف وممكن تقضي فيه وقت طويل من
غير ما تزهق، لكن ممكن تضطر تقوم لو حسيت أن المكان ازدحم وفيه ناس مش لاقية مكان
تقعد علشان تأكل، وده بـ يحصل كثير في بيسترو عمومًا، بس المشكلة دي هـ تقل للنصف
في الفرع الجديد العملاق.