The Definitive Guide to Living in the Capital , Cairo , Egypt

إحنا بـ نعشق أركان مول..
وزيارتنا المرة دي كانت استثنائية لأن على الرغم من الموجة الحارة الشديدة اللى
كانت فى القاهرة المكان هناك كان صواريخ هواء نقى ومنعش، ما كناش عاوزين نمشي،
واللى زود استمتاعنا أن عنينا وقعت على مطعم فتح جديد (لسه Soft Opening) اسمه «توباز – Topaz».

استقبلتنا بنت صغيرة لكن شاطرة
جدًا ومهذبة، أعطتنا المنيو علشان نتعرف على طبيعة المكان، عجبتنا الأطباق
والمقبلات خاصة أن فيها حاجات مبتكرة عن اللى اتعودنا نشوفها فى أماكن ثانية، فى
رمضان “توباز” بـ تقدم مشروبات رمضانية مجانًا (قمر دين وتمر هندي)،
والافتتاح الرسمي هـ يكون بعد الشهر الكريم.

المنيو فيها الأقسام العادية لأى
مكان، لكن الملفت عجبنا نوع سلاطة هناك اسمهاHeart of Palm (38 جنيه) ودي عبارة عن قطع من
قلب النخلة مع الخرشوف وشرائح الذرة الحلوة الصغيرة وطماطم الشيري قررنا نجربها،
طلبنا كمان فى المقبلات سمبوسك لحمة وجبنة (4 قطع 21 جنيه) المفروض بـ تختار إما
لحمة أو جبنة لكننا طلبنا أنها تنوع لنا منهم، فيه نوعين شوربة: مشروم وكمان شوربة
خضار (18 جنيه) وإحنا تحمسنا للثانية، البيف فيليه هناك بـ (105 جنيه) بـ تختار
معاه نوع صوص وكان البلو تشيز، وكمان طلبنا Stuffed Chicken (54 جنيه) وهى عبارة عن قطع فراخ
محشية فلفل ألوان وجبنة وعليها صوص أبيض من فوق.

بـ ينزل لنا زجاجة مياه كبيرة (13
جنيه) وسلة عيش توست أبيض وأسمر، وفى المشروبات طلبنا قمر الدين ومن المنيو ليمون
بالنعناع (18 جنيه)، الأكل كان تحفة، بـ تطلب اختيارين لك وكانوا خضار سوتيه
وبطاطس بيوريه، تقديم الطبق كان ابتكاري لأنهم كانوا حاطين الخضار جوه طبق صغير من
العيش المقرمش، البيوريه كان حلو قوي بس كان محتاج شوية لبن أو صوص أبيض يطريه لكنه
كان مضبوط، البيف فيليه طلبناه Well
done وبالفعل كان مستوي قوي وطعمه خيالى مع صوص البلو تشيز، والفراخ
كمان كانت مقطعة حلقات متواصلة مع بعض ومن كثر ما هى مستوية مش محتاجة سكينة مع
الصوص الأبيض الهائل بتاعها، السمبوسك كانت رائعة برضه، نيجي بقى لاختراع السلاطة
الفظيع، الخرشوف كان مستوي كويس وطعمه مع شرائح قلب النخل والذرة كان هائل، بس
نعتقد أن السلاطة دي مش هـ تكون مفضلة لك لو مش بـ تحب الخرشوف.

بالنسبة للعصائر قمر الدين كان
قوامه مضبوط وسكره كمان، الليمون بالنعناع كان لطيف لكن كان محتاج سكر شوية لأنه
كان لاذع قوي، مسك الختام فى التحلي بالتشيز كيك بالكراميل (29 جنيه)، طعمها كان
فيه قهوة شوية وصوص الكراميل كان خفيف وقوام الجبنة نفسه كان أخف من العادي..
تحفة.

المكان له 12% خدمة، وله مكان
للقعدة بالداخل والخارج، الـ Staff
جامد ومتمكن من شغله وبـ يتابعونا كل شوية لو محتاجين حاجة أو حابين نشرب مشروبات
ساخنة بعد الأكل.. وأنت معدي على أركان مول من الآخر لازم تعدي على
“توباز”.