The Definitive Guide to Living in the Capital , Cairo , Egypt

الفيسبوك بقى له دور فعال جدًا
لأي حد حابب يروج عن منتج بـ يملكه أو مكان حابب الناس تعرف عنه، ودى المرة مش
فاكرين الكام نتحمس أننا نروح مكان لما لقينا صفحته على فيسبوك، اللى فات كان «على بابا دونر
كباب» وآخر واحد كان مطعم «لا بيتزا كريسكي – La Pizza Cresci» الموجود عند مدخل باب السينما فى
داندي مول.

بعد ما خرجنا من السينما قلنا
نعدي عليه نجربه، المكان لسه فاتح ما بقالوش أربعة أيام ويمكن ده اللى بـ يفسر أنه
كان فاضي مافيهوش غيرنا وناس كمان، المطعم على أيدك اليمين وأنت خارج من الباب، له
طريقين لدخوله إما من الباب الجانبي اللى قبل باب الخروج أو تلاقى القعدة المفتوحة
بعد ما تخرج واللى معمولة على شكل قوس أو نصف دائرة وكلها تندة حمراء وعليها اسم
المطعم.

بعد ما قعدنا ودردشنا مع طاقم
الجرسونات الودود جدًا بصينا على المنيو المكونة من قسم للباستا والسلاطات
والبيتزا ولاحظنا أن الزعتر داخل فى مكونات أطباق كثيرة، كمان فيه مشروبات وقسم
صغير للتحلية. نوعية الأطباق عامة فرنسية لأننا كمان عرفنا أن “لا بيتزا
كريسكي” سلسلة مطاعم في مدن كان ونيس، وكمان المكونات اللى فى الأكل مستوردة
من هناك.

بعد شوية تفكير طلبنا بيتزا رين
دو سابا (54.50 جنيه) فيها مشروم وجبنة وطماطم ولما سألنا على حجمها قالوا لنا
أنها كبيرة لكن بـ تيجي على شكل Half
Moon أو نصف دائرة لأن ده Trend
المكان، ويمكن ده بـ يفسر التندة اللى على شكل نصف دائرة، كمان المميز عندهم أنها
بـ تتعمل على الحطب ولما سألنا على فرق التجهيز شرحوا لنا أنها بـ تعطى طعم مختلف
للبيتزا أفضل، ومن قائمة السلاطات أخذنا سلاطة سيزار (32.50 جنيه)، ومن الباستا مكرونة
ألفريدو (44.50 جنيه).

“لا بيتزا كريسكي” عاملين فكرة جديدة أنهم حاطين على الترابيزات مع كوفر الترابيزة سبراي “أووف” بتاع الوقاية من الحشرات، ده بجد! أكيد علشان دى المشكلة الأبدية للقعدات فى الأماكن المفتوحة، وبالتالى يكون عندك فرصة تقعد براحتك، الأطباق جاءت لنا بسرعة ما
انتظرناش كثير، البيتزا جاءت لنا رفيعة جدًا وأشبه بالعيش الشامي المحطوط عليه
مكونات، المفروض أن العجينة برضه مستوردة من فرنسا لكن إحنا حسينا من طعمها أنها
عيش أكثر ما منها عجينة بيتزا، المشكلة الثانية أنها كانت صعبة التقطيع وفيه بعض
أجزاء منها كانت ملسوعة من الفرن، المكونات اللى فوق كانت كويسة وفريش والجبنة
كانت كويسة.

المشكلة العامة فى الأكل كانت
الملح الكثير، وده اللى بلغناه لصاحب المكان وقت زيارتنا، كان واضح أكثر فى
الألفريدو اللى واجهتنا معاه مشكلة ثانية أن الصوص الأبيض كان خفيف قوي لدرجة أنه
كان بـ يقع من المكرونة المقصوصة وإحنا بـ نأكلها، سلاطة السيزار كانت عبارة عن خس
وكام شريحة جبنة من فوق وشريحتين أنشوجة كديكور، صوص السيزار كان لطيف بس حسينا
أننا بـ نأكل سلاطة خس بس.

فى نهاية زيارتنا ولأنهم لسه فاتحين
جديد قدم لنا المطعم تحلية “تيراميسو” مجاملة علشان يعرفوا رأينا فيه،
الكمية بتاعته كانت معقولة، السكر كان خفيف والقوام كمان لأنه عبارة عن قهوة وكريم
شانتيه وكيك، المرة دي ضبطت معاهم.

موضوع أن المكونات مستوردة من
فرنسا وأنها سلسلة مطعم عالمي حمستنا فى البداية لكن بعد التجربة ما اتبسطناش قوي من
النتيجة، الخدمة والضريبة كانوا كثير شوية على إجمالى الطلب (12% لكل على حدة)،
لكن التيراميسو عوضنا شوية.