دليل أحداث نهاية الأسبوع: حفل مشروع ليلى وعرض فلاش موب ونصير شمة ونغم مصري
Cairo 360
وسط حمى الانتخابات الرئاسية بـ نفكرك دائمًا أنك تغير جو وما تفضلش ماسك
ريموت الريسيـﭭر وعمال تقلب بين قنوات ONTV و CBC والحياة علشان تتفرج
على المناظرات الرئاسية والحوارات مع المرشحين. عارفين أن الموضوع مهم ومصيري، لكن
ده ما يمنعش أنك تنسى كل ده على الأقل ساعتين في الويك إند وتحضر حفلة موسيقية أو
عرض مسرحي أو تدخل سينما أو حتى تنزل تتمشى في الشوارع بلا هدف، لكن ياريت علشان خاطرنا بلاش تركن صف ثاني وتقفل على حد لو معاك عربية، ولا تنزل من باب
الركوب وتطلع من باب النزول لو كنت بـ تركب مترو الأنفاق. ولو بـ تركب ميكروباص
ابقى قول للسواق ما يقفش يحمل زبائن في وسط الشارع. تقريبًا دي من أكثر الحاجات
اللي ممكن تفسد علينا أي مشوار خارج البيت وتضيع لنا وقت مش قليل.
الأسبوع ده على غير العادة كل الحفلات والخروجات الأفضل في رأينا هـ تبقى
يوم السبت مش يوم الخميس والجمعة زي ما تعودنا.
النهاردة هـ يكون افتتاح لمهرجان القراءة
الأدبية لدول البحر المتوسط في المركز الثقافي الإيطالي، حدث ثقافي
كبير ومش بـ يتكرر إلا على فترات بعيدة، الحضور مجانًا.
على مسرح الجنينة في حديقة الأزهر في طريق صلاح سالم هـ
يكون فيه حفل لفريق “شرقي بلوز” اللي باين من اسمه طبعًا هو بـ يعزف إيه، نغمات البلوز على إيقاعات شرقية أو العكس، المهم أنها
حاجة جديدة وهـ تعجبكم.
ما تقلقش مش هـ تبعد عن جو انتخابات الرئاسة تمامًا
يعني، فيه معرض فني بعنوان الانتخابات في درب 17 18
في منطقة الفسطاط في مصر القديمة، رسوم وصور بـ ترصد حال البلد قبل أول انتخابات
رئاسية في مصر.
حاجة جديدة يمكن أول مرة هـ نشوفها في مصر وهو عرض فلاش موب Flash Mob، مجموعة من الناس بـ تتجمع في مكان عام زي شارع أو
ميدان أو محطة قطار ويقدموا استعرض معين لمدة 5 أو 10 دقائق وبعد كده يختفوا
تمامًا ويذوبوا وسط الناس، يمكن نكون شوفنا فيديوهات لحاجات شبيهة قبل كده على
يوتيوب أو فيسبوك، لكن المرة دي ممكن تشوفوها على الطبيعة في محطة مصر اللي في
ميدان رمسيس النهاردة الساعة 5 مساءً. طبعًا التواجد في محطة القطار مش محتاج
تذاكر، الفرجة مجانًا.
فرقة المصريين العريقة
بقيادة الموسيقار هاني شنودة هـ تلعب النهاردة الساعة 8 مساءً في قاعة الحكمة
بساقية الصاوي، سعر التذكرة 25 جنيه.
على المسرح الصغير بدار الأوبرا هـ يبقى فيه حفل لموسيقى الحجرة بقيادة المايسترو شريف صلاح الدين. وعلى المسرح الكبير هـ تقدم فرقة باليه القاهرة وأوركسترا
القاهرة السيمفوني عرض بعنوان “تانجو”
لمدة يومين: الخميس والجمعة. الدخول بالملابس الرسمية طبعًا.
بدأت عروض الصيف في بيت السحيمي وأماكن ثانية تابعة لصندوق
التنمية الثقافية، ويوم الجمعة هـ يكون فيه عرض أراجوز
وخيال ظل في بيت السحيمي والدخول مجانًا.
واحد من أفضل حفلات موسيقى الروك هـ يبقى في محمد علي كلوب يوم الجمعة،
الحفل بعنوان روك ستوب Rock
Stop وهـ يكون فيه فريق «مشروع ليلى»
اللبناني وعدد من أفضل الفرق والمغنيين المصريين زي Percussion
Show وSimplexity وهاني مصطفى. الحفل هـ
يبدأ من الساعة 3 العصر وسعر التذكرة 80 جنيه، وحاول تلحق تذكرتك بسرعة.
يوم السبت بقى عندنا حفلات جامدة في كل مكان، نصير
شمة في بيت الهراوي أو بيت العود، والحضور مجاني.
وفرقة سلالم في فندق
نوﭭوتيل الزمالك في مطعم أرجيلة، وده لازم تتصل بالمكان علشان تحجز مكانك.
حفل أمير عيد مطرب فرقة كايروكي هـ يقدم أغانيه على
الجيتار الأكوستك في قاعة النهر في ساقية الصاوي، والتذاكر بـ 25 جنيه.
وفي كايرو جاز كلوب هـ تقدم مريم
صالح (مطربة فريق “بركة” سابقًا) بمصاحبة فرقتها حفل غنائي. مريم بـ تقدم
أغانيها الأصلية اللي بعضها من ألحانها. الحجز ضروري.
ومرة ثانية رجعت عروض
التنورة في وكالة الغوري، إنشاد صوفي وآلات شعبية ورقص بالتنورة يوم
السبت الساعة 7:30 مساءً، والدخول مجانًا.
وأخيرًا بـ نفكركم بحفل فرقة نغم مصري على مسرح الجنينة في حديقة الأزهر. ناس كثير وحشها
شربيني مطرب الفريق وأوسو على الجيتار. حاول تروح وتحجز تذكرتك بدري لأنها هـ تبقى
زحمة إحنا متأكدين.
دي كانت الأحداث الثقافية المختارة اللي بـ نرشحها لكم من أجندة كايرو 360، لكن ممكن تدخلوا تلقوا نظرة على
الأجندة برضه ممكن تعجبكم حاجة ثانية إحنا مش كاتبين عنها في المقال ده. أجازة
سعيدة وأوقات ظريفة إن شاء الله.
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
