The Definitive Guide to Living in the Capital , Cairo , Egypt

منطقة الكوربة في مصر الجديدة من الأماكن الحيوية جدًا لتجمعات الشباب
علشان فيها عدد كبير من الكافيهات والقهاوي والمطاعم والأكشاك كمان، شارعى إبراهيم وبغداد هما الأهم في عدد أماكن الأكل والشرب في المنطقة الراقية، وكل الناس
عارفة أن هناك فيه “سيلانترو” و”بينوس” و”الشبراوي آرابياتا” و”هاريس” وقهاوي بلدي زي
“أسوان” وقهوة “السوايسة” ومحلات كثير من الموجودة على الشارع العمومي، لكن مش أي
حد يأخذ باله من المحلات الموجودة في شارع الصومال الجانبي المتفرع من شارع
إبراهيم اللي فيه مجموعة محلات أكل ظريفة اخترنا منهم النهاردة واحد علشان نكتب
عنه وهو «حاتي ابن البلد».

المطعم له شكل محلات الكباب التقليدي من الخارج والداخل، الكاشير خارج المحل
علشان هو شغال بشكل كبير على التيك آواي والشباب اللي بـ يأخذوا الأكل ويروحوا
يأكلوا في أي قهوة من القهاوي القريبة أو في عربياتهم. لكن إحنا المرة دي دخلنا في
عمق المحل في صالة الطعام، وأخذنا بالنا لأول مرة أن الجرسون بـ يكون لابس ملابس
رسمية وأن المعاملة شيك ومش متكلفة في نفس الوقت.

المنيو فيه المشويات العادية الموجودة عند أي كبابجي، وبسرعة كده الأسعار
125 جنيه للكباب و88 جنيه للكفتة و110 جنيه للستيك الكندوز وفيه حمام محشي بـ25
جنيه وفرخة شيش بـ 34 جنيه وكيلو الشيش طاووق بـ 70 جنيه. فيه أطباق زي الموزة
بالفتة ووورقة اللحمة والفاهيتا بأسعار من 40 لـ 50 جنيه، وطواجن بامية وعكاوي
وكباب حلة من 25 لـ 30 جنيه. الكميات في كل الأطباق والطواجن تعتبر كبيرة ومشبعة،
ممكن تطلب معاها أرز أو مكرونة بأشكال مختلفة. وكل الأصناف اللي قولناها فيه منها
ساندويتشات بالإضافة لساندويتشات برجر وسجق وفراخ كريسبي، وكلها بأسعار معقولة من
10 لـ 15 جنيه.

«ابن البلد» مشهور بالوجبات اللي فيها كل الأصناف وسعرها بـ يختلف حسب
الكمية، وجبة العمدة (30 جنيه) هي الأكبر وفيها كفتة وكباب وفراخ مشوية وممبار
وأرز وسلاطات، طلبناها علشان نجرب طعم كل الحاجات، الحقيقة الفراخ والممبار كانوا
أحلى حاجة في الوجبة لكن لحم الكباب والكفتة ما كانش ناضج كفاية، طبعًا مع السلاطات
–اللي برضه ما كانتش حلوة قوي- والأرز البسمتي المبهر كل حاجة ممكن تتاكل وتبقى
حلوة، لكن فيه فرق كبير بينه وبين محلات الكباب الثانية. فيه وجبات ثانية أسماؤهم
(أولاد العمدة) (شيخ البلد) و(شيخ الغفر) و(الغفير) وكل ما الرتبة تقل حجم الوجبة
يقل والسعر طبعًا. وفيه وجبة عائلية بـ 80 جنيه.

الخدمة جيدة والطلب بـ ينزل أمامك بعد 15 ساعة تقريبًا، وعلشان ما نزهقش
من الانتظار الجرسون عرض علينا طبقين شوربة لحم باللسان عصفور (4 جنيه) علشان نسخن
معدتنا، والحقيقة كانت حلوة وفتحت نفسنا على الأكل. جرب وجبات «ابن البلد» السريعة
والموفرة، أو اخطف لك ساندويتشين كفتة واقعد على القهوة.