دليل أحداث نهاية الأسبوع: حفلات موسيقية ومهرجانات وعروض مسرحية
Cairo 360
الجو حلو قوي اليومين دول، ما لكمش حجة بقى! نركز كده في الكام حاجة اللي هـ
نتكلم عنهم في المقال ده وأكيد هـ تلاقي خروجة تناسبك. الأماكن المفتوحة هـ تبقى
اختيار موفق في كل أيام الأجازة لأن اللي عرفناه من النشرات الجوية أن الجو هـ
يبقى مائل للدفء وبالليل معقول، ومافيش احتمالات أنها تمطر. ونشرتنا إحنا في
كايرو360 بـ تقول أن الخروج والتنطيط واجب ولو كانت حتى بـ تمطر زلط، أصل الويك
إند ده بالنسبة لنا زي عيد بـ ييجي كل أسبوع، وكلامنا هنا مش موجه للناس اللي بـ
تقضي العيد مع الأهل وبس.
الليلة دي (الخميس) فيه أكثر من حفلة موسيقية يمكن أهمهم حفل المطرب حاتم فهمي في ساقية الصاوي في الزمالك،
حاتم فهمي لو حد مش فاكر هو صاحب أغنية “مش من حقك” اللي كانت مكسرة
الدنيا من حوالي 7 سنين، الحفل هـ يبدأ الساعة 8 مساءً وسعر التذكرة 25 جنيه بس.
ولمحبي الفنان يحيى خليل
ممكن تشوفوه النهاردة في كايرو جاز كلوب مع فرقته، واستمتعوا بمقطوعات الجاز
الشرقي المميزة، وبعد يحيى خليل مباشرة هـ يلعب دي جي بيكا مجموعة من أغاني الهاوس
وتراكاته الأصلية، والحجز ضروري دائمًا في كايرو جاز كلوب.
في «مكان» في وسط البلد قريب من ضريح سعد زغلول فيه ليلة مايك مفتوح بمناسبة يوم المرأة العالمي،
سجل اسمك بالإيميل وروح قول اللي أنت عاوزه أمام الميكروفون.
وفي «ستيليتو» هـ تدفع 150 جنيه حد للطلبات علشان تدخل
وتتفرج على دي جي فيدو وتستمتع بأقوى
تراكات الهيب هوب والـ R’n’B ويفضل أنك تتصل علشان تلاقي مكانك
قبل ما تروح.
يوم الجمعة يوم هائل، حفل من أول اليوم لآخره في حديقة
العروبة بطريق صلاح سالم، هـ يبدأ الساعة 3 العصر وهـ يستمر لحد منتصف الليل، مكان
مفتوح وجو جميل، وعدد كبير من الفرق والفنانين هـ يحيوا الحفل منهم بلاك تيما
ومسار إجباري وسلالم ودينا الوديدي وأسفلت وتاكسي باند وغيرهم. المهرجان يعتبر أكبر تجمع للفرق الموسيقية المصرية،
سعر التذكرة 60 جنيه، وبـ نرشح الحفل ده لقراءنا بشدة.
والساعة 2 ظهرًا أمام كوستا كوفي الموجود في شارع 9 في
المعادي هـ يكون فيه عرض إيقاعات خطير لـ Percussion Show .
لو عاوز خروجة ليلية ممكن تروح ياسو لاونج اللبناني وتحضر عرض
دي جي أحمد الديب ودي جي Nitrane وNacelle
لكن اتصل واحجز مكانك قبلها.
أو تروح أوبيم وتحضر لمافيا
الهاوس العربي اللي بـ يقدموا أغاني الثمانينات والتسعينيات بستايل
جديد. العرض ده بـ يكون كل يوم جمعة في نفس المكان والحد الأدنى للطلبات 200 جنيه.
وفي ساقية الصاوي هـ يكون فيه عرض مشابه لأغاني قديمة
لكن أمريكية من مسارح برودواي الشهيرة بقيادة فرناندو
مارتين مع كورال الساقية (كاميراتا) وده هـ يكون في قاعة الحكمة الساعة
8 مساءً.
يوم السبت الموافق 10 مارس هـ يكون فيه حفل موسيقى Heavy Metal في ساقية الصاوي بمشاركة
أكثر من فرقة بمناسبة مرور عام على إقامة مهرجان Metal Blast وسعر التذكرة 20 جنيه.
وفي وكالة الغوري بـ يتجدد اللقاء مع عرض التنورة الرائع
والمرة دي بمصاحبة الإنشاد الصوفي والآلات الشعبية زي الربابة والصاجات والمزمار
والطبلة، عرض مميز ما يتفوتش، ولو فاتك يوم السبت ممكن تحضره يوم الاثنين أو
الأربعاء.
فيه مهرجان للأفلام الهندية بالتعاون مع السفارة الهندية
هـ تكون فعالياته مستمرة في ساقية الصاوي أيام الخميس والجمعة والسبت، ممكن تعرف
تفاصيل أكثر عن الأفلام اللي هـ تتعرض وأسعار الدخول من
هنا.
وفيه مناقشة لكتاب «أصله ماعداش على مصر» مع د.هبة ياسين
في الساقية يوم الجمعة، وفيه معرض مهم بعنوان “فتاة الدبابة” أو Tank Girl
في جاليري مصر للفنانة نادين همام، هـ يتم افتتاحه يوم الخميس.
وفي مركز درب 17 18 هـ يكون فيه معرض بعنوان “رؤى متوازنة” بالتعاون مع الجامعة
الأمريكية يضم 27 فنان كلهم طلاب صغيرين في السن.
وفي مركز الجزيرة للفنون ولهواة العروض المسرحية ممكن
تحضر عرض مسرحية “الحارس”
والدعوة عامة يعني من غير فلوس، والعرض مستمر لمدة 3 أيام. وفيه عرض مسرحية “إثبات العكس” على مسرح روابط.
أخيرًا لازم نفكركم أن فيه ندوة مهمة بعنوان “سوسيولوجيا الثورة المصرية” للدكتور سعيد صادق
في قاعة الكلمة بساقية الصاوي، ونعتقد دي مهمة جدًا لمحاولة فهم التغيرات اللي
طرأت على المجتمع المصري بعد الثورة.
حفلات ومعارض ومسرحيات وندوات، ولو دورتم في أجندة كايرو
360 هـ تلاقوا حاجات ثانية كمان تعملوها، نشوفكم في شوارع كايرو في الويك
إند.. سلام.
مقترح
معالم وسياحة
زاوية أيدكين: حكاية أول خانقاه مملوكية في قلب القاهرة
اثار مملوكية في مصر خانقاه في القاهرة +2
معالم وسياحة
أشهر المساجد التاريخية في القاهرة.. معالم مذهلة بتحكي تاريخ عريق
أشهر مساجد القاهرة أقدم مساجد مصر +5
مطاعم
