The Definitive Guide to Living in the Capital , Cairo , Egypt

من ناحية الباب المؤدي للسينما في
داندي مول هـ تلاقى قعدة كنب واخدة مساحة جنب السلم الكهربائي وأنت ماشى للداخل
شوية أمام محل «زارا – Zara»
ومطعم «تشيليز – Chili’s»..
أيوه.. هو ده بالضبط مكان «كافيه دي لوسو – Caffe di Lusso».

المكان بـ يغلب عليه اللونين
البني والأسود، فيه كنب وكراسي كثير واخدة شكل حرف الـ “L” لأن المكان مغلق عامل كأنه
مربع كبير والقعدة كلها لجوه والمخدات ملونة أخضر وبرتقالى وألوان مبهجة أعطت روح
للمكان.

الأسعار هناك كويسة والمنيو شيك
والاختيارات متنوعة فيه: قهوة باردة وساخنة وعصائر طازجة وكوكتيلات وقائمة للأفطار
ومخبوزات وكريب وحلوى الوافلز والسلاطات والساندويتشات والرابس.

ما كناش جعانين قوي فطلبنا
مشروبات، قلنا نجرب حاجة مختلفة اسمها بيري ستروباري (28.95 جنيه) ودي عبارة عن فراولة
وموز وعصير برتقال ممزوجين سويًا مع بولة فراولة ومعاها بولتين آيس كريم فراولة،
الوصف أبهرنا لكن لما شفناه تفاجأنا من المنظر، المزيج كان شكله رائع والآيس كريم
كمان لكن كل حاجة كانت لوحدها! ده بجد، العصير كان لوحده في كأس وبولتين الآيس
كريم في طبق جانبى لوحدهم، ده غير أن آيس كريم الفراولة ما كانش موجود فـ
استبدلناه بنكهتى الفانيليا وعين الجمل. طعم كل واحدة على حدة كان حلو لكن بطننا
عامت من كثر السوائل والحاجات الساقعة اللي أخذناها، بصراحة إحنا مش مقتنعين بفكرة
أن كل حاجة تكون لوحدها وما كناش شايفين أى علاقة ما بينهم!

كمان جربنا كافيه فيينا كلاسيك (16.95
جنيه) وكان عبارة عن أكسبريسو ولبن وكريمة مخفوقة وصوص شوكولاتة، المزيج كان حلو
والكمية كمان.

قسم التحلية كان فيه اختيارات
كثير من كيك شوكولاتة وتشيز كيك ومافين وأبل باي وغيرها، اختارنا كريب بالكراميل (21.95
جنيه) وحطينا عليها أكسترا مكسرات (5.95 جنيه) وكانت العجينة حلوة وسكرها معقول
والكراميل كمان والمكسرات فريش إلا أننا حسينا أن ممكن يضاف لهم حاجة كمان علشان
يربط بين الطعمين سويًا، لأننا حسينا بطعم كل واحدة منفصلة عن الثانية، لكن عامة
كانت كويسة.

كافيه دي لوسو له فرع وحيد بتاع
داندى مول لكن هـ يفتتحوا قريب فرعين في السادس من أكتوبر فى منطقة الحصري والثالث
هـ يكون في الزمالك قريب، لما طلبنا الشيك كان فيه خدمة (8.86 جنيه) وضريبة (8.27
جنيه) ومافيش حد أدنى للطلبات.