The Definitive Guide to Living in the Capital , Cairo , Egypt

من حوالي أسبوعين نزلت سامبلز من أغاني ألبوم عمرو دياب الجديد اللي طال
إنتظاره، واللي عنوانه «بناديك تعالى». السامبلز نزلت في صورة كول تون على
الموبايل، بس مافيش ساعات بعد نزولها وعاشقي عمرو دياب جمعوهم في تراك واحد
ورفعوها على اليوتيوب، وتم تناقلها على مواقع التواصل الإجتماعي زي الفيس بوك.

رغم أن جودة سامبلز الأغاني مش قوية (طبعاً لأنها مجرد كول تون)، لكن
الأغاني عملت شقلبة للناس ومحدش بـ يبطل كلام عنها، ده غير أن كمان من يومين نزلت
أغنية الهيد بتاعة الألبوم «بناديك تعالى» على راديو دياب اف ام وعلى راديو
روتانا، وبعد يوم كمان نزلت أغنية ثانية من نفس الألبوم اسمها “هللا هللا”.
إحنا سمعنا السامبلز والأغنيتين اللي نزلوا كمان، وهـ نقولكم رأينا..

السامبلز اللي نزلت كانوا لـ 12 أغنية، كل أغنية منهم في حدود 30 ثانية.
أول أغنية “بناديك تعالى” دخلتها قوية، وكان فيها مزج مظبوط جداً
للنغمات الشرقية مع الغربية، لغاية ما بدأ الكلام في الأغنية، حسينا أن فيه نغمة
في الخلفية عاملة نشاذ، لكن التوزيع مظبوط. بالنسبة لكلام الأغنية، هو جميل، بس
قليل جداً! الأغنية كلها متكرر فيها جملة “بناديك تعالى”، أما
الكوبليهين الثانيين عبارة عن جملتين بس ومش بـ يتعادوا ولو لمرة واحدة! أكيد فيه
نظرية وراء أن الأغنية تبقى كده، بس إحنا استغربناها جداً. الأغنية اللي بعدها
اسمها “هللا هللا”، وديه ثاني أغنية نزلت على راديو دياب اف ام.
لحن الأغنية واخد تيب أغاني الريجي شوية، وكلامها كلام حب ودلع كأغلب أغاني عمرو
دياب مؤخراً.

الـ 10 أغاني الثانيين مجرد كول تون لغاية دلوقتي، ولمّا سمعناهم عجبونا
وحسينا أن فيه تنوع. أغنية “مقدرش أنا” ديه شكلها هـ تبقى الدلع
كله، فيها تقسيم وطبلة، وبـ يقول فيها “مقدرش أنا عاللي عيني شايفاه، الرقة
ديه آه يا سحر عينيه حاجة فوق خيالي”. بعد كده فيه أغنيات اسمائها: “ألومك
ليه”، “معاك برتاح”، هي حياتي”، “مالي عينيا”، و”أغلى
من عمري”.

فيه كمان 3 أغاني اتسمعوا قبل كده في حفلات عمرو دياب، هما: “عارف
حبيبي”، “يا ريت سنك”، و”تجربة وعدت”. وطبعاً
كالعادة الأغاني في الحفلات بـ تبقى حاجة، وفي الشريط حاجة ثانية، أكثر أغنية
اتغيرت معالمها هي أغنية تجربة وعدت، لمّا عمرو غناها في حفلة من كام سنة فاتوا
كانت هادئة وحزينة جداً، لكن فوجئنا في الألبوم أن ريتمها بقى سريع ومعاها بييت
عالي وطبلة.

الأغنية الهادئة الرومانسية واللي متوقعين لها ضجة كبيرة هي أغنية “يوم
ما اتقابلنا”، وديه لحنها هادىء وكلماتها بـ تقول: “يوم ما اتقابلنا
اليوم ده هـ افضل مش ناسيه، أنا اتكتبلي أحلى قصة حب فيه”.

الشىء الملحوظ في سامبلز الأغاني، هو غياب أغنية كلامها حزين ولحنها هادىء،
زي مثلاً أغنية “يهمك في إيه” من الألبوم اللي فات لعمرو دياب، واللي
لغاية دلوقتي متصدرة قائمة الأغاني الحزينة.

ألبوم “بناديك تعالى” متوقع أنه هـ ينزل في أواخر شهر سبتمبر أو
أول شهر أكتوبر، وادينا كلنا مستنيين.