The Definitive Guide to Living in the Capital , Cairo , Egypt

لمدة
أسابيع كنا بـ نعدّي على «كافيه مكس» في شارع 26 يوليو ومستنيين أنه يفتح. الديكور
من الخارج ومن الداخل كان مخلينا عايزين نجربه. بصور مارلين مونرو وأودري هيبورن
على الحوائط، تحس أن الكافيه موجود في مدينة نيويورك.

«كافيه
مكس» هو كوفي شوب صغير بـ 10 ترابيزات فقط، حوالي 7 ترابيزات بالداخل والباقي برة.
أثناء الدخول من باب الكافيه خلّوا بالكم واوعوا تتكعبلوا في العتبة العالية، هـ
تلاقوا على الشمال مكتبة فيها كتب ومجلات، وفي نصفها فيه شاشة تليفزيون مسطحة،
لمّا إحنا رُحنا كانت شغالة على قناة أخبار. أغلب الترابيزات عليها قعدات وكراسي
مختلفة، والإضاءة في السقف مختلفة مش كلها زي بعض. فيه سبورة على الحائط مكتوب
عليها بالطباشير منيو المشروبات. كل ده بـ يخللي الديكور الداخلي لـ «كافيه مكس»
ممتع للنظر وبطريقة عصرية.

الكاونتر
كبير، وتقدر تطلب قهوتك تيك أواي من هناك. الويترز لابسين أبيض وأسود، ولابسين كاپات
على رأسهم، والموسيقى وقت ما رُحنا كانت فرنساوي على ألماني!

بما
أنه كوفي شوب، «كافيه مكس» بـ يقدم أنواع متنوعة من القهوة، تبتدي من 9 جنيه
للقهوة التركي، ولغاية 15 جنيه للكابوتشينو. تقدر كمان تطلب أي نوع قهوة منهم مثلج.
فيه نوعين ميلك شيك على المنيو (أوريو ونوتيلا؛ أي واحد بـ 15 جنيه)، وأنواع كثير
من العصائر الفريش زي الكانتالوپ، الفراولة، والبطيخ. وقت ما رُحنا، كان عصير
الليمون بس هو اللي متوفر (11 جنيه). منيو الأكل كان لأطباق الأفطار زي الكرواسون
بالزبدة والعسل (15 جنيه)، والسپانيش أومليت (13 جنيه). فيه كمان الساندوتشات
العادية زي الفراخ (18 جنيه)، السلمون (25 جنيه)، التونا (15 جنيه)، والدوبل تشيز
(17 جنيه). وبعيد عن ده فيه شوية أنواع پيتزا بـ تبدأ من 20 جنيه لـ 35 جنيه،
والسلاطات من 14 جنيه لـ 26 جنيه. لمّا سألنا إيه هي سلطة “السلمون الأسود”
عشان شكلها غريب، الويتر قال لنا أنه طبق آسيوي وأنه ماكانش متوفر وقتها.

الكابوتشينو
كان كويس بس ما نزلش معاه سكر. ونفس الحكاية مع الشاي بالنعناع (8 جنيه)، والناس
في مصر بـ تحب قوي أن السكر بتاعها يبقى مظبوط زي ما بـ يحبوا وبـ يبقوا عايزين
السكر برة عشان يظبطوه بمعرفتهم. أومليت المشروم والجبنة (13 جنيه) كان من غير
مشروم، وبدلاً منه كان فيه بصل. ماكانش فيه عيش مع الأومليت، وكمان مانزلش معاه
ملح وفلفل. الترابيزة اللي جنبنا طلبوا زينا ونزل لهم سلة فيها عيش، ومن بعيد كان
شكله حلو. ساندوتش السلمون (25 جنيه) كان متقدم في خبز بني مع بصل أحمر، كريم
تشيز، وشوية سلطة صغيرة. كان مش بطال بس مفيش فيه حاجة مميزة. الوجبتين كان معاهم
بطاطس شيبسي وزيتون.

فيه
في الخلف حمام صغير مختلط للسيدات والرجال. وقت ما رُحنا ماكانش فيه ورق حمام ولا
مناديل، والأرض كانت مبلولة شوية.

رغم أننا فاهمين كويس أن «كافيه
مكس» يادوب لسّه فاتح، بس ده مش عذر أنهم مايبقاش متوفر عندهم حاجات كتير من
المنيو. لكن رغم كده، العاملين هناك ودودين جدًا وبـ يحاولوا جدًا أنهم يخلوا
قعدتك هناك ممتعة. من الآخر «كافيه مكس» مش مكان وحش لقهوة سريعة ووجبة خفيفة، بس مش
بـ يقدم أي حاجة مميزة.