The Definitive Guide to Living in the Capital , Cairo , Egypt

فيه أسباب كتيرة
تخلي الواحد يحب الكوربة٬ والأكل الحلو واحد من الأسباب دي. «هاريس كافيه – Harris Café» من الأماكن اللي ليها
شعبيتها في الكوربة٬ مكان ممكن تقعد فيه مع أصحابك تستمتع بسلاطة فريش٬ سندويتش حلو
وكوباية قهوة اللي هي. المكان صغير ومتقفل بإزاز وفيه حوالي دستة ترابيزات مدورة. القهوة
الحلوة والإنترنت بـ يخلوا المكان مناسب للشغل أو للخروج مع الأصحاب في أي وقت. بالليل
المكان بـ يبقى مليان بالأصحاب اللي بـ يشربوا قهوتهم وعشاهم.

الـ«Irish Nut Latte» (لاتيه المكسرات
الايرلندي) بـ 20جنيه، واحد من أحلى كوبايات القهوة اللي ممكن تشربها في القاهرة٬
ده غير ان طعم المكسرات في بوقك بعد ما تشربه بـ يبقى جنان. وكمان شربات الـIrish» Cream»  بـ يديله طعم لاذع شوية وجميل٬ وده بـ يتقدم في
شكل طبقات من المكونات وعلى الوش اللبن المزبد.

بالنسبة للأكل٬
سلطة الفراخ الإيطالية (34 جنيه) وجبة متكاملة في حد ذاتها: خس صابح٬ جزر مبشور٬
كرنب متقطع٬ شرايح طماطم وبصل٬ كل ده فوق صدر فرخة مشوي عليه موتزاريلا
وأوريجانو. السلطة دي عبارة عن بولة مليانة ألوان وطعم وكل مكوناتها فريش. وعلى
فكرة هي كبيرة٬ ولو طالبة معاك غدا جامد٬ هـ تكفيك.

«كيسيديا الفراخ –
Chicken Quesadilla» (30 جنيه) طبق مقبلات
عبارة عن 4 قطع كيسيديا (عيش التورتيا المحمص) محشية فراخ مشوية وبصل وفلفل أصفر
وأحمر وأخضر. ومع ان الأكل كان طازة٬ إلا أن الكيسيديا كانت محتاجة تبقى مقرمشة
أكتر٬ ودي حاجة ضرورية جداً فيه.

وكان متقدم معاه «پيكو دي جالو – pico de
gallo» ودي سلطة الطماطم٬ والأعشاب
والفلفل المكسيكي المشهور٬ وكانت برضه طازة. طبق المقبلات ده جيه معاه شيبسي وكول سلو٬
والأخير كان مقرمش ومعمول من كرنب وجزر طازة.

مكرونة الفراخ
والمشروم پيستو (44 جنيه) كانت طبق مكرونة شكل الفيونكا
(Farfalle) مليان٬ وعليه فراخ
مشوية ومشروم في صوص پيستو كتير! الوحش كان إن المشروم كان معلب
لكن المكرونة بصوص الپيستو الحلو البيتي والفراخ عوضوا الموضوع ده.
وجبة مشبعة وممكن تشبع إتنين مش جعانين قوي.

أخدنا كريب البلح
(25 جنيه) عشان نحلي بيه٬ وكان حكاية. البلح كان عليه قرفة مخلوطة بتوابل تانية٬
وملفوف بتلاتة راقات كريب٬ ومحطوط عليها كراميل وكريمة مخفوقة، والبلح كان طعمه
رائع ومشبع جداً٬ لدرجة اننا مقدرناش نخلصه.

بوجه عام السلطات
في المكان هـ تكلفك من 20 لـ 30 جنيه٬ والسندويتشات من 30 لـ 40 جنيه والمكرونة من
35 لـ 45 جنيه. القهوة من 10 لـ 20 جنيه. وكمان الإنترنت بـ 5 جنيه للساعة.