The Definitive Guide to Living in the Capital , Cairo , Egypt

لو حسيت أنك مخنوق من
جنون القاهرة ودوشتها وحياتك مزحومة ومش لاحق تعمل حاجة ولا قادر حتى تحافظ على
نظامك الغذائي ولا على لياقتك، خد نفس عميييق وسيب الموضوع ده
لـ”أوكسـﭽين” و هو هـ يرجعك للياقتك المثالية مرة تانية.

فتح مؤخرًا في ميدان
عمان، على أحدث طراز ومجهز بأفضل معدات التدريب وفي شكل جمالي رائع، أول ما تدخل
المكان هـ تعرف أنك مش داخل ﭼـيم عادي أو الـﭼـيم المصري التقليدى، وده راجع للممر
الزجاجي اللي بـ يوديك لصالة الاستقبال والصالة نفسها المبنية بالحجارة اللي بـ
تلمع بـ تقول أنك جاي مكان في منتهى الشياكة. 

في مدخل الدور التاني هتلاقى
بار لتقديم القهوة أو العصير، والدور كله منوّر بنور الشمس ومفروش بفرش مودرن
باللون الأخضر والأرضيات خشب باركيه بـ تلمع. صالة التدريب المختلطة موجودة على
الناحية التانية من الممر المتغطي بالزجاج ده، صالة مدوَّرة واسعة جدًا مليانة
بأحدث أجهزة التدريب ومجموعة كبيرة من الأوزان المتخصصة لتدريب عضلات محددة جدًا
في الجسم. وهـ تلاقي المدربين موجودين حواليك طول الوقت عشان يساعدوك بس ده بـ
يكون بتكلفة إضافية غير رسوم الاشتراك.

كل حاجة في حتة لوحدها
خاصة بها؛ عجلات التخسيس والمشايات الـ”Elliptical Machine”
والمشايات العادية، وكمان فيه أوضة أيروبكس متعددة الأغراض مليانة كِوَّر وقطع
سجاد صغير وأحبال مطاطة وبكرات الأثقال العادية، وأوضة تانية صغيرة بس مكفيّة
مجموعة من العَجَل المرصوص بشكل دائري، وفيه مساحة واسعة مخصصة كلها لكنبات تدريب
“Benches”
وأرفف الأوزان، مش زي المساحات الضيقة اللي بـ تكون مخصصة للغرض ده صالات ﭼـيم
تانية.

جنب بار المشروبات بتاع
“أوكسـﭽين” هـ تلاقي مكان تغيير الملابس والدواليب اللي مش مجرد أوضة
تغيَّر فيها هدومك وتاخد دُش. بجانب موضوع الأمان وأن صعب حد يفتح المكان
بتاعك اللي الجيم موفره للمتمرنين، والدُش الأفقي العريض اللي في الحمام، فيه كمان
ﭼـاكوزي خاص بكل أوضة وساونا وغرفة بخار وترابيزة مساﭺ وحمام مغربي، أكيد هي دي
طريقة الاسترخاء النموذجية اللي بـ تنهي حالة الشد العصبي أوالضغط! صحيح المساﭺ
والحمام المغربي ليهم حساب لوحدهم بس الدواليب والساونا والـﭼـاكوزي والبخار من
ضمن امتيازات الاشتراك العادية.

فيه مكان صغير مخصص
للسيدات فيه حاجة واحدة من كل حاجة: عجلة تخسيس ومشاية يدوية ومشاية عادية مجهزة
بشاشات لمس وفتحات للـiPod
ووصلات للـUSB لو
عايزين نشغّل مزيكا، وفيه حاجات زيادة في مكان السيدات زي كِوَّر الأيروبيك و”Benches”
زيادة لتمرينات البطن وتليفزيون مسطح كبير عشان تتفرج وما تحسش بالتعب وانت بـ
تتمرن.

مفتوح 24 ساعة في اليوم
طول الأسبوع، طبعًا مكان زي ده ما تتوقعش أنه يكون رخيص، العضوية لمدة شهر هـ
تكلفك 850 جنيه، والعضوية السنوية هـ تزيد عن 4600 جنيه. صحيح غالي شويتين؛ بس
مافيش حاجة تِغلى على أنك تكون في كامل لياقتك.